Главная » Файлы » "Табасарандин нурар" [ Добавить материал ]

Уж’вал ва мясляаьт
01.06.2011, 16:46
Ниъматулла Аьзизов,
Дербент шагьрин 2-пи нумрайин Жвумийин мистан имамдин кюмекчи.

«Табасарандин нурар» газат урхурайидариз ислам диндикан шлубкьан дерин аьгъювалар тувуб, аьхиримжи вахтна ислам диндиъ гъягъюрайи гьяракатарикан ктибтуб ккун апIури,  Дербент шагьрин 2-пи нумрайин Жвумийин мистан имамдин кюмекчи, гьаму мистаъ дарсар туврайи ихь ватанагьли Ниъматулла Аьзизовдихьна илтIикIунча.
Бисмиллагьи рягьмани рягьим.Ислам кIуру гафнан мянайикан кIурубси гъабхьиш, дидкан гизаф китабариъ дибикIна. Хъа узу жикъиди пидиза. Ислам гафнан мяна – гафариинди, ляхнариинди ва фикрариинди Аллагьдиз мютIюгъ хьуб ву. Аку дюн’яйиин ва аьхиратдиъ инсаниятдиз уж’вал ва хайир хьпан бадали, ислам динди амрарин ва шараитарин бина ккивна. Магьа Аллагьдихьан ихь Пайгъамбрихьна дуфнайи вягь’ю-илгьамдин сабпи гафар, амрар «Икьраъ» - урх кIурайиб ву. Мусурман вуза кIуру кас урхрур, илмарикан хабар айир духьну ккунду. Жакьвлиз тIибхбан бадали кьюб хлинцц фици лазим вуш, мусурман касдизра кьюб илим – дюн’яйикан ва аьхиратдикан – лазим ву. Мусурман касдиз гьаму илмар аьгъю хьувал – аьхю уж’вал ву. 
Ислам динди ухьу чвйирна чйирси хьуб тIалаб апIура. Аллагьдин амрикан Кьур’андиъ гьамци дупна: «Гьякикьиди Аллагьдихъ хъугърайидар чвйир ву. Кьюр чвуччвун арайиъ ислягьвал апIинай. («Ашь-Гюжюрат» сура, 10-пи аят).
Ислягьвалихьна дих апIру исламдин амрарикан таниш вуйиризра, даруризра салам тувуб ву. Мусурман ляхнарикан ужударсдар фунудар ву, кIури, Пайгъамбриз туву суалназ, дугъу гьамциб жаваб тувну: «Таниш вуйиризра, даруризра салам тувуб ва тIяам гьивуб». Хъанара гъапну: «Фукьан бицIи уж’вал вушра, думу дарапIди мигъитанай. Ачухъ маш дапIну, разиди инсанарихьна удучIвубра сувабнан ляхин, уж’вал ву. Уж’валнан гафра садакьа ву». Гьаддиз ухьу апIру гьарсаб ляхин, гаф – чIал инсандин кIваъ шадвал ипруси дапIну ккунду. Яв гъардаш зулумкар вушра, ясана зулмикк ккайир вушра, дугъаз кюмек дапIну ккунду.
«Зулмикк ккайириз фици кюмек апIуруш агъячуз, хъа зулум апIруриз фици кюмек апIуча», - кIури, Пайгъамбрихьан гьерхну. Пайгъамбри жаваб тувну: «Кюмек, гьадму касдин хил дибисну, зулумдихъан хътауб ву».
Сабсана мисал хурза. Кьюр мусурман ханжлар хьади кархьуз удучIвиш, дурар кьюридра жегьеннем агьалйир, цIигъ хьиди. Пайгъамбрихьан гьерхну: «Гъивур зулумкар ву, жегьеннемдиъ шул, хъа дукIнайир гьаз жегьеннемдиъ шул?» Пайгъамбри жаваб тувну: «Думу дукIнайирра чан юлдаш йикIуз чIуру ният ади удучIвур ву. Гьаддиз, дурар кьюридра жегьеннемдин цIигъ хьиди». 
Улихьна заманайиъ, «крестовый походарин» вахтари, Палестина вари мусурман вилаят вуди гъабхьну. Кьудс кIуру шагьриъ (гьамус дидиз Иерусалим кIура) мусурмнарин дюн’яйиъ айи гирами мисатрикан шубубпи мист а. Думу мист хачперезари ва жугьдари гьамусра гирами апIура. Хачперезари думу шагьур гъибисган, душваъ айи мусурмнар йихури, ифи удубзури, жюрбежюр зулмар апIури гъахьну. КIури гъахьнуки: «Мусурмнарин ифи гьяйвнарин фунарихьнакьан рубкьури гъабхьну». Хъасин, хайлин йисар гъушган, Салагьюддин султанди, вари мусурман вилаятар сатIи дапIну, Аллагьдин кюмекниинди ва амриинди думу шагьур азад гъапIну. Салагьюддин ва дугъан кьушмар (мусурмнар), думу шагьриъ учIвруган, Салагьюддин такабурвал ктарди, кIул ис дапIну, Аллагьдиз шюкюр апIури, учIвну. Думуган хачперезари кIури гъахьну: «Гьамус ухьлан кьисас алдабгъиди. Ухьу мусурмнарин ифи фици удубзнуш, гьациб зулум ухь’инара хибди». Амма Салагьюддинди дурариз рягьимлувал улупну: «Ислам диндиз гъачай. Гъюрдарш, гьар йисан мусурман хазнайиз (жизйа) садакьа тувай. Палестина хъана мусурмнарихьна дуфна. Садакьа тувуз рази дарудар хачперезарин вилаятариз удучIвну гъарахри». Медина ва Мекка шагьарриъра Аллагьдин амрариинди мусурмнарин кьушмари гъалибвал гъадабгъну. Кяфирарихьан мютIюгъ хьубтIан артухъ фукIара апIуз гъабхьундар. Пайгъамбриз, учкан гьамус фу апIурва, кIури, суал тувиган, дугъу: «Гъарахай, учву азад вучва», - гъапну. Пайгъамбрин гьамциб рягьимлували, ислам диндин рякъяри дюн’яйиинра, аьхиратдиъра инсанариз бахт тувра, инсанар мучIувалиан адаура. Инсандин рюгь Аллагьдихьна багахь апIурайиб дин ву. Диндин кIулин вазифа, иллагьки гьамусдин девриъ, ислягьвал уьбхюб, вари динарин кьувватар кидикьну, гьамусдин ва гъюрайи наслиз ватанпервервалин тербия тувуб, чIуру ляхнарихьан, чIуру ниятарихьан ярхла апIуб ву. Гъи ихь арайиъ аьдати исламдин рякъ дибиснайидар ва хъапIрайидар гизаф а. 
 Вагьабизм Саудовский Аравияйиъ арайиз дуфнайи саб циркил ву. Салафитари, дин марцци йишварихьна хурача, кIура. Марцци йишвариз гъягърудариз дурари тюгьмет йивура, Пайгъамбрарихьна, шейхарихьна, устазарихьна илтIикIуб писуб вуди гьисаб апIура. Дагъустандиъ тIарикьат дин хъапIрайидарихъди дяви дубхну ккунду, кIура. Исламдихъ хъугърайидариз дурари исламдиъ чпин рякъяр дивуб дюз вуйибси гьисаб апIура. Дурар чпи ислам диндин рякълан улдугнайидар, гьякьвалин ва кучIалвалин гъаври даршулайидар, эдеблувалин къайдйирикан хабарсузар, асккан дережайин иман айидар ву. Ислам динди фу къадагъа апIураш, вагьабитари думу чпихъ хъпехъру жигьилариз илтIибкIну улупура. Дурарин арайиъ вягьши эсткремизм ва терроризм жанлу шула.
Гьаму ва гизаф жара суалариз жаваб тувуб вагьабитарикан, экстремистарикан, террористарикан асиллу шула. Инсан йивну йикIувал ислам диндиъ варитIан аьхю гунагьси гьисаб апIура. Хъа мусурмнари мусурмнар йивну йихуб – саб жюрейииндира гъаври ахъуз шлуб дар.
Категория: "Табасарандин нурар" | Добавил: Admin
Просмотров: 793 | Загрузок: 0 | Рейтинг: 0.0/0
Всего комментариев: 0
avatar