| Главная » Файлы » "Табасарандин нурар" | [ Добавить материал ] |
Рягьимлу юкIв айир
| 17.06.2011, 23:09 | |
| Гъийин макьала 20 йистIан артухъ Хив больницайиъ
медседстради лихурайи, инсанарин юкIвариъ чакан аку ва мани хиялар
гъитрайи Шелфи Шабукаевайиз бахш апIуз ккундузуз. Шелфи Шабукаевайихъди узу чпин пишекарвалин машквран йигъан улихь гюрюшмиш гъахьунза ва чан уьмрикан, ляхникан, юлдшарикан ктибтуб ккун гъапIнийза. - Духтирвалин кесп бицIи вахтнаан юкIв алиб вуйиз. Иццру касдиз жвувхьан шлу кюмек тувуз фуну вахтнара удукьувал – му инсандин бахтси гьибгъуйзуз. Бязи медсестрйирин рягьимлували узу гьяйран апIуйи. Ва узура, гьеле мектебдиъ урхури амиди, инсанариз узхьан шлу кюмек тувуб, инсанарин сагъвал уьбхбан гъайгъу зигуб йиз уьмрин мяна вуйивал гьисс гъапIнийза. Сагъвал инсандин варитIан аьхю девлет ву кIури шулу. Дугъриданна, сагъвал айи инсан варитIан бахтлур ва шадур ву. Хъа гьадму сагъвал уьбхбаз инсандиз кюмекнан хил гьачIабккурайидар медицинайин пишекрар ву. Йиз хиялар ачухъ гъапIиган, абйир-бабари узуз Пятигорск шагьрин мединститутдиз урхуз гъягъюз теклиф диву. Анжагъ душваъ урхуз ккунидарин аьхю конкурс айивалиан, йиз ляхин дюз гъабхьундайи. Натижайиъ узу Дербент шагьрин медучилищейин акушервалин отделение ккудубкIунза. Йиз зегьметнан рякъ 1990-пи йислан ккебгъну. Сифте узу бицIидарин патронажный медсестради кьабул гъапIнийи. Кьяляхъна йисари дишагьлийириз гъуллугъ апIру консультацияйиъ гъилихунза. 2006-пи йисан узу Хив ЦРБ-йин поликлиникайин кIулин медсестради тяйин гъапIну. Узу йиз гьар йигъандин ляхин поликлиникайин вари кабинетар ляхниз гьязурди айивалин ахтармишарилан ккебгъраза. Поликлиникайин марццишин уьбхювал гьарган гюзчиваликк ккайиз. Хъа йиз асас вазифа – агьалйирин сагъвал уьбхюб вуйивал сабанра кIваълан гьапIрадарза. - Узухьна гизафси илтIикIура-йидар, аьхъю дубхьну, иццру гъахьидар, жюрбежюр хатIйириан зийнар, уьргъбар гъахьидар, больничный кагъзар ккунидар ва гь.ж. ву. Медсестрайин инчI кайи, ачухъ маш гъябкъиган, аьзарлуйин гевюл ачухъ шулу. Йиз фикриан, медсестра ачухъ рюгьнан, фунуб вахтнара кюмекнан хил гьачIабккуз гьязур вуйир, гьарсар аьзарлуйихьна хусуси рафтар дагну, чан багъри касдихьнаси янамиш шлур духьну ккунду. КIури шулу, медсестра сифтена-сифте дярябкъруриз улар, лицуз даршлуриз ликар ву. Му гафар дугъридар ву. Анжагъ зиихъ дупнайи гафариз тялукь вуйи касарихьантIан медсестрайин пише тамам апIуз шлуб дар. Медсестра сабурлур духьну ккунду, – къайд гъапIу Шелфи Хайирбеговнайи. Гьюрматлу медсестрайи чан ляхнин вазифйирикан, ляхнин юлдшарикан хайлин вахтна гьевеслуди ктибтурайи. - Узуз йиз ляхниъ хайлин ужудар духтрарихъди лихуб кьисмат гъабхьунзуз. Ухьухь гьам духтрарин, гьам райондин агьалйирин терефнаан аьхю гьюрмат айи медсестрйир а. Дицисдар инсанарихъди лихруган, дурарин иццрурихьна вуйи янашмиш’вал гъябкъиган, медицинайин гъурулушдиъ лихуз артухъси ккун шулу. Узура дицисдар гъуллугъчйириз ухшар хьуз зегьмет зигури шулза. Дарпиди гъитуз шулдар, аьхиримжи йисари учухьна ляхниз гъюрайи жигьил пишекрар лап зяифдар, пишекарвалин бина адрудар ву. Мицдар дюшюшариъ жавабдарвал шликан тIалаб апIуруш, читин шула: жигьил пишекрарикан, даршсана дурар гьязур гъапIу илимдин идарйирикан. ГьапIурва, учуз дурар цIийикIултIан гьязур апIуб алабхъура, - кIура Шелфи Шабукаевайи. Шелфи Хайирбеговнайи коллективдин ва агьалйирин арайиъ аьхю гьюрмат гъазанмиш дапIна. Дугъан зегьмет швнуб-сабан больницайин, «Хивский район» МО-йин администрацияйин, РД-йин сагъламвалин Министерствойин терефнаан Гьюрматнан грамотйириинди лишанлу дапIна. Думу заан категорияйин пишекар ву. Думу агьалйириз кюмек тувуз гьар вахтна гьязур ву. | |
| Просмотров: 935 | Загрузок: 0 | | |
| Всего комментариев: 0 | |