Главная » Файлы » "Табасарандин нурар" [ Добавить материал ]

Музыкайи гьевеслу гъапIур
22.04.2011, 22:00
авторы:Зубайдат Шябанова

Аьхиримжи йисари бажаранвал кайи жигьилариз государствойин терефнаан аьхю фикир тувуз хъюгъна. Президентдин грантар, жюрбежюр министерствйириан Дипломар ва гьюрматнан Грамотйир гъадагъурайи жигьиларин арайиъ ихь ватандашар айивали ухьу шад ва дамагълу апIура. Гьацдар бажаранлу жигьиларин арайиъ Рустам Аьбдуллаевра а. Рустамдин абйир-бабар Хив райондин Чювекк гъул’ан Каспийск шагьриз лап улихьна йисари кюч гъахьну. Мектебдиз гъягъюз яш гъабхьи Рустам чан дадайи Каспийск шагьрин музыкайинна хореографияйин гимназияйиз тувнийи. Гимназияйиъ дугъу 5-пи классдизкьан музыкайин отделениейиъ урхури гъахьну. Хъасин Рустамдин бажаранвал гъябкъю мялимари бай «Вокал» классдиз гьаъну. Думу йисхъан Рустамдин эстрадайин уьмур ккебгъну. Дугъу сифте, мектебдин жюрбежюр серенжемариъ жанлуди иштирак шули, аьхю аьшкьниинди мяълийир апIури гъахьну. Хъасин дугъаз шагьриъ тешкил апIурайи серенжемариз теклиф апIуз хъюгъну. Рустам ихь республикайиъ гъушу «Полет сокола», «Первый шаг» конкурсарин гъалибчира ву. Мидланна гъайри, думу Карачаево-Черкессия Республикайин Домбай шагьриъ гъягъру Кафари Кавказдин жюрбежюр форумариъ, Москвайин «Кремлевские елки» ва «Детство без границ» фестивалариъ гьар йисан иштирак шула.
«Полет сокола» конкурсдиъ гъалибвал гъадабгъу бажаранлу бай Чехияйин Прага шагьриз конкурсдиз гьаъру.
- Рустам, уву гъушу шагьрарикан варитIан кьабул гъабхьи шагьур фунуб ву?
- Ихь республикайиъ узуз Мягьячгъала, Дербент, Избербаш, Дагъ.Огни шагьрариъ, хъа республикайин сяргьятарилан тинди Черкесск, Домбай, Сочи, Туапсе, Москва, Волгоград шагьрариъ гъягъру фестивалариъ, конкурсариъ иштирак хьуз теклифар гъафнийзуз. ВаритIан кьабул гъабхьи шагьур Прага вузуз. Узу душваъ вари халкьарин «Сюгьюрлу перде» фестивалиъ иштирак гъахьнийза ва 1-пи дережайин премияйин сагьиб гъахьунза.
- Саб вахтна уву республикайин бицIидарин парламентдин председателдира лихури гъахьнийва…
- Ав, узу 2010-пи йисан аьхириз ихь республикайин бицIидарин парламентдин председателди лихури гъахьунза. БицIидарин парламентдин председателди анжагъ мектебдиъ урхурайи живан дерккузтIан ихтияр адар. Хъа узу, мектеб ккудубкIу-райивал гьисабназ гъадабгъну, Каспийск шагьрин жигьиларин парламентдин председателди тяйин гъапIну. Йиз ляхниъ узуз мектебариъ урхурайи живанарихъди, бицIидарихъди гъабхурайи ватанпересвалин тербия тувбан ляхин гужал апIуз, наркотикариз, терроризмйиз, коррупцияйиз, эктсремизмйиз аькси сюгьбатар гъахуз кюмек туврайи Республикайин жигьиларин ляхнариз лигру комитетдин председателин заместитель Муслимат Халимбеговайиз ва Каспийск шагьрин вари миллетарин дуствалин аьлакьйир уьрхру клубдин председатель Ольга Алексеевнайиз чугъсагъул мялум апIуз ккундузуз.
- Рустам, мектеб ккудубкIбалан кьяляхъ фицдар планар вуяв? Увуз ГИТИС-диан чпихьна Москвайиз урхуз гъюбан теклифар апIура кIуру хабрар дюз вуйин?
- Ав, узуз душв’ан теклифнан кагъаз дуфна. Амма йиз гележег узуз журналистикайин пишейиъ рябкъюра. Музыка гатIабхьидарза. ЦIиб улихьнаси РУ ТВ-йи тешкил гъапIу конкурсдиъра гъалиб гъахьнийза. Жюрийи узуз ва аьхиримжи вахтна ихь республикайин эстрадайин хяд Лауриттайиз варитIан заан баллар дивнийи. Эстрадайин сягьнатIан узу йиз мектеб заан аьгъювалариз ккудубкIуб сабпи пландиъ дивунза. Гьарсаб ляхниз чан вахт ва сяаьт а.
Ав, Рустам гьякь ву. Амма гьарсаб ляхнихъди, мектебдин дарсарихъди сабси, думу республикайин, вари Урусатдин конкурсарин, фестиваларин, олимпиадйирин гъалибчира шула. Дугъаз РД-йин культурайин, образованиейин министерствйириан, жигьиларин ляхнариз лигру комитетдиан, вари халкьарин фестиваларин тешкиллувалин комитетариан Дипломар тувна. Гележегдиъ бажаранлу бали фуну рякъ ктабгъуруш, вахтну чав улупиди.

Категория: "Табасарандин нурар" | Добавил: Admin
Просмотров: 726 | Загрузок: 0 | Рейтинг: 0.0/0
Всего комментариев: 0
avatar