Славик Ибрагьимов 1996-пи йисан Хив райондин Мажвгул гъулаъ нежбер хизандиъ бабкан гъахьну. Дугъан уьмур чан тай баярихьан тафавутлуди гъубшундар. Анжагъ бицIиди амиди дугъан юкIв хулаздитIан чIатариз гизаф зигури шуйи. Гизаф ккажаргъувал, ярхлаз гъванар гатIахьувал, юкьяр дисувал дугъаз хас вуйи лишнар вуйи. Славикдиз варитIан ккуни дарс физкультура вуйи. Физкультурайин дарснаъ дугъан натижйир гьарган чан тай баяринтIан заандар шули гъахьну. Славикдихьанси ярхлаз кIикIлар, гъванар гатIахьуз удудукьру баяриз дугъан маш ккади шулдайи. Амма думу, сариканра гиран дарапIди, спортдиан чан улупбар, натижйир ужу апIбахъ хъергну гъахьну.
   Мажвгул гъулан кьялан мектебдиъ спортдин зал гьяракатнаъ ипган, дарсарин кьяляхъ Славикдин йигъандин вахт гьадушваъ чан дустарихъди гъябгъюри шуйи. Мектебдиъ урхуб ккудубкIурайи аьхиримжи йисан чаз спортдиан аьгъювалар туврайи мялим, пягьливан Эрзиман Агъабеговдин регьберваликкди Славик гирйирин спортдиин машгъул шулу. 2012-пи йисан майдин 5-пи йигъан Славикди ГТО-йин нормативдин имтигьян лап рягьятди тувру. Хьуд йигълан дугъу кьюбпи разряддин тIалабар тамам апIуру. 2011-пи йисан гъахьи 6 талитнаъ йирхьуб ражну Славик гъалиб шулу.
   2012-пи йисанра дугъу чав иштирак гъахьи 5 талитнаъ хьуб ражну гъалибвал гъазанмиш апIуру. Гьадму йисан Хив райондиъ 27-пи мартдиъ кIули гъубшу гирйирин спортдин талитариъ дугъу сабпи йишв гъадабгъну. Апрелин 25-диъ мектебариъ урхурайидарин арайиъ гъуху республикайин талитариъра Славик сабпи йишван сагьиб шулу.
Славикди улупу варитIан заан натижа 73 кг. гъагъ айи спортсменарин арайиъ 16 кг. гъагъ гъюру гиря 300 ражну за апIувал гъабхьну. Думу Хив райондин грамотайиинди ва Дагъустан Республикайин просвещениейин ва илимдин Министерствойин сабпи дережайин дипломдиинди лишанлу дапIна.
   Славикдиз гележегдиъ хъана заан хъуркьувалар, спортдин заан аьршариз удучIвувал ккун апIурхьа. Белки, ихь девлетлу ватанагьлийирикан дугъан дирбаш,валар артмиш апIбаз спонсорвалин кюмек апIрударра удучIвур.