Главная » Файлы » "Табасарандин нурар" [ Добавить материал ]

Гьаз мици шула?
28.03.2011, 13:34
авторы:Алиева Феруза

Натижайиъ гъи Хив район государствойин улихь 13 млн. манатдин буржлу ву. Агьалйирин яшайишдин дережа за апIбан гъайгъушнаъ ади, аьхиримжи йисари Хив райондин гъулар табиаьтдин газрахъди тямин апIбан ляхнар гъизгъинди гъушну ва давамра шула. Табиаьтдин газрахъди агьалйир тямин апIбан Программайин бинайиин алди, ккудубшу йисан ерли бюджетдин харжариинди Ургъа ва Ляхла гъулан администрацйирин дахилнаъ айи гъулариз газран линия гъизигну. Багарихьди думу гъуларин агьалйирира газракан мянфяаьт ктабгъиди. Мажвгул, Яракк, Зильдикк ва Гъвандикк гъуларин админстрацйирин гъулариз газ зигбан ляхнар гъизгъинди тамам апIура. Хив райондин имбу гъуларин агьалйир газрахъди тямин ву. Гьамусяаьтна Хив райондин 2200-тIан артухъ хизанари, хайлин карханйирин гъуллугъчйири табиаьтдин газ ишлетмиш апIура.
- Агьалйир газрахъди ужуди тямин ву. Хъа гъубгу газрахъан гьякъи уч апIувалин ляхниъ учуз хайлин читинвалар алахьура. Пулин дакьатар адрувал себеб вуди, агьалйири ишлетмиш гъапIу газрахъан пул тувуваликкан кIулар ккадагъура. Гъийин йигъаз Хив район государствойин улихь гъубгу газрахъан 13 млн. манат буржлу ву, - кIура «Газпром межрегионгаз Пятигорск» ООО-йин РД-йиъ айи филиалин Хив ва Къурагь районарин газарин абонентский пунктарин начальник Шамсудин Хановди. – Къанундин бинайиин алди, гъубгу газрахъан 40 йигъандин арайиъ пул тутруву абонентарин газар хътатIурача. Касиб хизанариз, коммуналин игьтияжариз кюмек вуди, государствойин терефнаан субсидйир тувра. Агьалйирихьан думу субсидйир учхьан ва РЭС-диан «буржлу дар» кIуру справкйир тувгантIан адагъуз шулдар. 2010-пи йисан Хив райондин агьайлириз 5 млн. субсидйир тувна, хъа дидкан газрахъан тувнайи гьякъи 2,5 млн. манаттIан дар. Имбу пулин дакьатар агьалйири чпин хусуси метлебариз ишлетмиш гъапIну. Натижайиъ Хив райондин агьалйириз ккудубшу йисан сентябрь вазлилан мина субсидйир кепеккьан рукьурадар. Гьаз гъапиш дурар буржлуди гъузра. Коммуналин игьтияжариз туврайи субсидйир агьалйири «пенсйирик гьисаб апIура».
Къайд апIуз ккундузуз, агьалйирин тIалабариинди, 761-пи Къарарин бинайиин алди, субсидия гъубгу газрахъан чан счетдиз хътапIуз шулу. Анжагъ абонентди субсидйирин отделиз заявление бикIуб лазим ву.
Ич коллектив юкьур касдикан ибарат ву. Кьюр гъуллугъчи вазлин арайиъ вари гъуларилан илдицуз хъуркьрадар, хъа агьалйириз гъубгу газран улупбар духну ккуниб кIваълан гъябгъюра. Пул вахтниинди тувуз удукьурадаршра, счетчикарин улупбар вахтниинди хуб лазим ву, - давам гъапIну дугъу.
- Гъубгу газран улупбар учухьна агьалйири чпи духну ккунду. Учу дидин зиин гюзчивал гъабхурача. Узу зиихъ гъапиганси, счетчикарин улупбар вахтниинди духну ккунду. Хъа агьалйири думу ляхин фикирназ гъадабгъурадар. Дурарин гьякьнаан 549-пи ва 307-пи нумрайиккди Къарарар кьабул дапIна. 549-пи Къарариъ дупна: «Эгер агьалйири счетчикарин улупбар хурадарш, гъубгу газрахъан гьякъи РД-йиъ кьабул дапIнайи кьялан кьадарниинди гьисаб апIуб лазим ву». Натижайиъ агьалйирин улупбартIан думу кьадар кьюб-шубуб ражари артухъ шула. Дицисдар камиваларра агьалйирин вижнасузвалин натижа ву. Гьарсар касди чан жавабдарвал гьисс апIури гъахьиш, мицдар нукьсанвалар даршул, - аьлава гъапIну Ш.Хановди.




Категория: "Табасарандин нурар" | Добавил: Admin
Просмотров: 686 | Загрузок: 0 | Рейтинг: 0.0/0
Всего комментариев: 0
avatar