Спорт – сагъламвалин бина ва макан вуйиб фикриз гъадабгъну, Дербент шагьрин физкультура ва спорт артмиш, спортдин мектебарин материалинна техникайин бина мюгькам апIбаз шагьрин администрацияйи артухъ фикир тувра. Администрацияйи бюджетдиан туврайи пулин кьадарра йислан-йисаз артухъ апIура.
   Спорт артмиш апIбан плановый политикайиъ бицIидаринна живанарин спортдин мектебари аьхю роль уйнамиш апIура. Душвариан удучIвурайи спортсменари шагьрин агьалйирин юкIвар шад апIура. Гьаму аьгьвалатнак ич 5-пи нумрайин ДЮСШ-йин коллективдира аьхю пай кивра.
   Узу Табасаран райондин ТIюрягъ гъулаъ 1966-пи йисан бабкан гъахьунза. Новосибирск шагьриъ халкьдин мяишатдин институтдин промышленностдин ляхин идара апIру факультетдиъ урхуз учIвунза ва экономиствалин пише гъадабгъунза. Хъасин Омск шагьриъ государствойин физкультурайинна спортдин институт ккудубкIунза. Узу СССР-ин спортдин мастер, РД-йин ФК-йинна спортдин лайикьлу гъуллугъчи вуза.
   Дербентдин 5-пи нумрайин ДЮСШ-йи спортсменар артмиш апIбак лайикьлу пай кивра. Гьаму спортдин мектбедин улихь заан пишекарвалин спортсменар гьязур апIбан вазифа дивна. Гьар вазли, яшнан дестйириз лигну, гъирагъдилан, мектебариан теклифназ гъюрайидарихъди талитар гъахурача. Спортдин мектебариз гъюрайи урхурайидарихъди гюрюшар гъахурача. 
   Гьаму мектебдиъ 15 мялим-тренери ляхин апIура. Дурарикан 4 – РД-йин физкультурайинна спортдин лайикьлу гъуллугъчйир, 5 - заан категория айидар, 4 – СССР-ин спортдин мастерар, 2 – вари халкьарин классдин спортдин мастерар (дурарикан сар – Багьаудин Абасов – ихь ватанагьли ву). Вари лихурайи 15 кас заан махсус образование айидар ву. Гьамушваъ 500-тIан артухъ касдиз 28 дестейиъ аьгъювалар тувра. Асас вуди дзюдойин, юкьяр дисбан, боксдин ва ригъ гьудубчIвру терефнан текбатек кичIихбарин (каратэ, ушу-саньда, кинг-боксинг ва жарадар) отделенйир а.
  Ккудубшу урхру йисан аьхирариз айи улупбариинди, эвелин аьгъю-валар тувру 13 дестейиъ 330 кас, урхбанна тренировкйир гъахру 14 дестейиъ - 138, дзюдойин 12 дестейиъ - 294, юкIвяр дисбан 7 дестейиъ – 130 кас а. ЦIийи урхру йисанра аьгъювалар гъадагъурайидарин ва дестйирин кьадар саки гьадму дережайиъ ами. Дестйир тешкил гъапIхъан тренерари ужуб удукьувал айи жигьилар гъядягъюру, цIийи кьувватарин игьтияж яратмиш апIуру. 
   5-пи нумрайин ДЮСШ-йи гьаму вахтна  РФ-йин спортдин 10 мастер гьязур гъапIну. Дурари жюрбежюр йишвариъ спортдин ляхин давам апIура. Гьамусяаьтна урхурайидар шагьрин ва республикайин спортдин талитариъ иштирак шула. Мисалназ, ккудубшу йисан айтIан ляхнарин органарин Йигъаз тешкил гъапIу талитариъ гьаму мектебдиъ урхурайи 300 спортсмен иштирак гъахьну. Гъалиб гъахьидарин жергейин иштиракчйириз пулин пешкешар ва дипломар тувну. 
   Баку шагьриъ кIули гъубху Варихалкьарин турнириъ иштирак гъахьи Рамин Аслановди сабпи йишв гъадабгъну. Варшава шагьриъ Европайин Кубокдиз гъуху талитариъ Зулкьайда Рамазановди - сабпи йишв. Урусатдин Минобразованиейин чемпионатдиъ Заур Рамазановди шубубпи йишв гъазанмиш гъапIну. Гьаму йисан 16-17-пи февралиъ дзюдойиан Волгограддиъ кIули гъубху Урусатдин чемпионатдиъ Рамазанов Зулкьайда РФ-йин чемпион гъахьну. 
   Мягьячгъалайиъ дзюдойиан кIули гъубху РД-йин чемпионатдиъ Мурад Амирметовди сабпи йишв, Вариурусатдин турнириъ дугъу ва Рамиз Юсуповди кьюбпи йишвар гъазанмиш гъапIну. Тверь шагьриъ кIули гъубху Европайин Кубокдиъ Зулкьайда Рамазановди шубубпи йишв, дзюдойиан РД-йин чемпионатдиъ Аьбдулла Расуловди шубубпи йишв гъадагъну.  
  Гьамцдар хъуркьувалар мушваъ спортдин вари жюрйириан гъазанмиш апIура. Мисалназ, юкьяр дисбаан Табасаран райондиъ Кьалухъ Мирзайиз бахш дапIнайи республикайин турнириъ, иштирак духьну пешкешнан йишвар гъадагъну. Хасавюртдиъ Заглав Аьбдулбеговдин пешкешназ кIули гъубху РД-йин чемпионатдиъ пешкешар гъадагъну. Гьаму мектебдин спортсменари кинг-боксингдиан Урусатдин Кубокдиз Владимир шагьриъ гъуху уйнамишариъ 63,5 кг. айидарин арайиъ Мурад Гьясанялиевди кьюбпи йишв, 86 кг. гъагъ айидарин арайиъ Ферудин Рамазановди шубубпи йишв гъадагъну. 2012-пи йисан кинг-боксингдиан Избербашдиъ кIули гъубху РД-йин уйнамишариъ 81 кг. гъагъ айидарин арайиъ Аьгьмед Наврузовди шубубпи йишв, 48 кг. гъагъ айидарин арайиъ Эльбрус Султановди шубубпи йишв, 91 кг. айидарин арайиъ Зубайру Мирзоевди кьюбпи йишв гъадагъну.
   5-пи ДЮСШ-йиъ урхурайи саки варж касдиз жюрбежюр разрядар а: дзюдойиан – 48, юкьяр дисбаан – 32, боксдиан – 8, кинг–боксингдиан – 18.
   Гьаму ва гъахурайи жара серенжемарин тешкиллувализ, арайиз дуфнайи хъуркьувалариз ГУО-йин руководствойира ужуб кьимат тувра.

Насруллагь Асланбегов,
Дербентдин 5-пи нумрайин ДЮСШ-йин директор