| Главная » Файлы » "Табасарандин нурар" | [ Добавить материал ] |
Чечендин дявдин иштиракчи
| 28.03.2011, 13:40 | |
| авторы:Буньямин Багъдаев Чечендиъ гъабхьи дявдин гьяракатариъ иштирак духьну, къанун, къайда-низам мюгькам гъапIу, уьлкейиъ хатIасузвал ва саламатвал тямин апIбак чпин лайикьлу пай киву гъуллугъчйири ихь уьмриъ важиблу йишв бисура. Ватандин улихь вафалуди чан буржи тамам апIурайи гьацдар гъуллугъчйирикан сар гьаму макьалайин игит, Чечендин сабпи дявдин иштиракчи, Мягьячгъалайин военкоматдин призывдин кьюбпи отделениейин начальник, подполковник, Табасаран райондин Хючна гъулан агьали Альберт Рягьимов ву. Му заан гъуллугънахьна гъяйиз подполковник Рягьимовди хайлин такабур рякъ ккадапIну. 1986-пи йисан Хючнаарин кьялан мектеб ккудубкIну, 1987-1989-пи йисари СССР-ин Яракьлу Кьувватариъ чан ватандаш’валин буржи тамам гъапIну. 1989-1992-пи йисари, Дагъустандин государствойин медицинайин институтдиъ урхури, дявдин кафедрайин тамам курс ккудубкIну, лейтенантдин звание гъадабгъну. 1995-пи йисан Альберт Рягьимов контрактдин къайдайиинди Мягьярамкент райондин дявдин комиссарин кюмекчиди тяйин гъапIну. Шубуд йислан думу Мягьячгъалайин Советский райвоенкоматдин 3-пи отделениейиз офицерин гъуллугъниина гъафну ва 2000-пи йисан душваъ аьхюну офицерин гъуллугъниин дерккну. 2003-2004-пи йисари Дагъустан Республикайин дявдин комиссариатдиъ, 2005-пи йисан Мягьячгъалайин Ленинский райвоенкоматдиъ гъилихну. 2006-пи йисан 15-пи июлихъан мина Мягьячгъалайин дявдин комиссариатдин 2-пи отделениейин начальникди лихура. 1995-пи йисан 22-пи июндилан 30-пи октябризкьан А.Рягьимовдиз Чечен республикайиъ гъабхьи сабпи дявдиъ иштираквал апIуб алабхъну. Чечендин дявдикан подполковникди гьамци ктибтура: «Думуган йиз вазифа, дявдин хусуси метлеб айи гьяракатар дюзди, эскрар тIанкь даршлуганси духну, боевикариин гъалиб духьну, дявдин майдандиан удучIвуб вуйи. Чечен дявдиъ, урус эскрарна чеченарин дявдин дестйир ктарди, вари халкьарин террористари чеченарин терефнаан Урусатдин Яракьлу Кьувватарихъди женг гъабхури гъахьну. Дурарин швнуб-саб десте пуч гъапIишра, сакьюдар йигъарилан цIийи дестйирихъди дяви гъабхуб алабхъури гъабхьунчуз. Тактикайин тIалабариз гъилигу къайдайиъди узу дюзмиш гъапIу хусуси метлеб айи гьяракатнаъ 27 боевик тIанкь гъапIунча. Зийнар гъахьидарин ва жин гъапIдарин кьадар аьгъю апIру мумкинвалар адайи. Дявдиъ, гьелбетда, кьюбиб терефарианра йихрудар, зийнар гъахьидар шулу. Бязи вахтари чеченарин боевикари дявдин майдандиъ гъийиху ихь эскрарин майтар жин апIру дюшюшарра алахьури гъахьунчуз. Дурар жин апIбан метлебра учу йисирвализ гъадагъу боевикарихъди думу майтар дигиш апIуб вуйи. Гьаддихъан мина, дявдин операция ккудубкIубси, гъийиху ихь эскрарин майтар, сатIи дапIну, чпин ватандиз гьаъри гъахьунча. Сабсан хусуси метлеб айи операция кIваина хурза. Учу, саб дагъдин машнак дийигъну, боевикарин дестйирин «мукьар» айи йишвар ахтармиш апIури гъахьунча. Узу тартиб дапIнайи хусуси метлеб айи операцияйин тактикайин планди боевикари дагъдин машарик «мукьар» дапIнаш-дапIнадарш ахтармиш апIуз мумкинвал тувнийи. Дурар, йиз аьгъювалиан, дагъдин кIанариъ, яркврариъ жин духьну ккундийи. Дагъдин машар, кIакIар вари ахтармиш апIбалан кьяляхъ бронетранспортерариъди гъюрайи ич разведдесте дагъдин кIанаъ - ярквраъ - жин духьнайи боевикари кьялаъ тIапIну. Бронетранспортер хъапIрайи эскри машин саб тепейилан тмуну тепейиина ккатIабхьруганси диш гъапIну. Багахь хьайи ярквразди учIвну, вари десте сагъ-саламатди гъузунча. Разведкайиз гьау кьюр-шубур кас, ккеънайи боевикари кьялаъ тIаъну, йисирвализ гъадагъру, ясана тIанкь апIру вахтарра шуйи. Чечендин дявдин гюллйирин сесер гъира ибариъ атIагури амийиз». Чечендин дявдиъ А.Рягьимовди гьязур гъапIу тактикайин хусуси метлеб айи кьюб операцйирин натижайиъ ихь ватанагьли сабан «Суворовдин медализ», хъасин «Кутузовдин медализ» лайикьлу гъахьну. Думу гьацира «Дявдин аьлакьйир мюгькам апIбан бадали», «Дявдин гьунарарин кьюбпи дережайин», «Дявдин гьунарарин сабпи дережайин», «Дявдин гъуллугънаъ машгьур хьпан шубубпи дережайин», «Дявдин гъуллугънаъ машгьур хьпан кьюбпи дережайин» медалариинди лишанлу дапIна. Мидланна гъайри, дугъаз хъана мухрик китIру знакар тувна: «За верность долгу», «Участник боевых действий», «Знак отличия военнослужащих СКВО». Думу аьхю хизандин эйсира ву. Альберт Амирялиевичди шубур велед тербияламиш апIура. Ихь ватанагьли, подполковник Альберт Рягьимовдиз гележегдиъ чав апIурайи гъагъи ва жавабдар ляхниъ хъана заан хъуркьувалар, хизандиъ шадвал ккун апIурахьа. | |
| Просмотров: 988 | Загрузок: 0 | | |
| Всего комментариев: 0 | |