Главная » Файлы » "Табасарандин нурар" [ Добавить материал ]

Ватанпервер хизан
24.02.2011, 11:52
авторы:Алиева Феруза

Рюгьлувалин лишниккди тербияламиш гъапIу гъардшар Ибрагьимовар гъи вари Ватандин саламатвал уьбхбан гъаравлиъ а.
Фагьумсуз инсанари, чпин чIуру кьастар ачухъди тарагъури, аьхиримжи йисари агьалйирин юкIварик гъам-хажалат кипна. Хъа узу ихь ругариин ислягьвал мюгькам ва гележегдиъ ихь Ватандин – Урусатдин - халкьарин арайиъ айи дуствал ва сабвал мюгькам шлубдиин инанмиш вуза. Фицики ихь арайиъ аькьюллу, намуслу ватанперверар цIиб адар. Гележегдиъ гьякь’вал ва дюзвал гъалиб шлубдинра гъавриъ ахьа.
Гъи му макьалайиъ узуз чпин уьмур ва вари кьувватар ихь сикинвал ва саламатвал уьбхбаз сарф апIурайи Ибрагьимоварин хизандикан улхуз ккундузуз.
Хив райондин Асккан Яракк гъулаъ Ибрагьимоварин хизан гизаф гьюрматлуб ва такабуруб ву. Чан вари уьмур жигьил наслариз аьгъювалар ва тербия тувбаз бахш гъапIу РД-йин лайикьлу мялим Ибрагьим халуйин хизандиъ йицIур велед аьхю ва тербияламиш гъахьну. Му хизандиъ аьхю гъахьи веледарикан анжагъ халис ватанперверар шлубдин саб шакра адайи. Фицики дурари тербияйин ляхниъ асас фикир аьхюр-бицIирин гьюрмат уьбхювализ, гьялал зегьметназ ва гъазанжариз чпин кьувватар сарф апIбаз тувну. Хал яр-дустари, хялари абцIну хьувал -му хизандиъ варитIан аьхю девлет ва хазна вуди гьисаб апIура гъапишра, ягъалмиш даршул.
Дугъриданра, веледарин гележег абайин тербияйиз лайикьлуб, асасуб гъабхьну. Дурарикан гъи Чечен ва Дагъустан Республикйирин сяргьятариин гъягъюрайи пис гьяракатарихъди женгчйир, халис ватанперверар гъахьну.
Йиз сюгьбатчйир Чечендин ва ихь республикайиъ гъягъюрайи гьяракатарин иштиракчи, подполковник Гьяжагъа ва дугъан уьмрин юлдаш, дугъахъди сабси айтIан ляхнариъ гъуллугъ апIурайи Замира Ибрагьимовар ву.
- Гьяжагъа Ибрагьимович, уву сифте Чечендин дявйириъ, хъа гьамус Дагъустан Республикайиъ гъягъюрайи гьяракатариъ иштирак шулайиб жиниб дар. Дидиз улихьна вуйи ва яв гъийин уьмрикан фу пуз шулу?
- 1987-пи йисан Асккан Яракк гъулаъ кьялан мектеб ккудубкIну, Урусатдин Яракьлу кьувватарин жергйириз гъуллугъ апIуз гъушунза. Армияйиъ гъубшу уьмрикан улхуруш, узу Ватандин улихь йиз буржи Орел шагьриъ тамам гъапIунза. Армияйин кьяляхъ йисари, аьгъюваларихъ юкIв хъайивалиан, урхуб давам апIбанди гъахьунза. Дидихъди сабси, Орел шагьрин гъулан мяишатдин институтдик кучIвунза. Думу институт хъуркьувалиинди ккудубкIну, жюрбежюр йишвариъ гъуллугъ апIури гъахьунза.
Амма Ватандихъан юкIв убгурайи жигьилиз му цирклиъ фаркьатвал гъибихъундар. Ватандиз гъуллугъ апIуб дугъаз чан уьмрин метлебси рябкъюра.
Гьяжагъа Ибрагьимович 1998-пи йисан сентябрь вазли МВД-йиъ гъуллугъ апIуз хъюгъру. Му йисари думу жюрбежюр гъуллугъариъ гъахьну.
Думу йисари Чечендиъ гъати женгар гъягъюрайи. 1999-пи йисан диндинна политикайин къанунсуз яракьламиш духьнайи дестйир Дагъустандин Кафари районариин алархьнийи. Гьяжагъа Ибрагьимов думуган Новолак, Буртунай ва жара гъулариъ гъубшу дявдин иштиракчи гъахьну. Гьелбетда, дяви рягьятуб шлуб дар. Дявдин натижа ва метлеб душмандиин гъалиб хьуб ву. Дагъустан халкьарин сатIивали, игитвали думу женгариъ гъалиб хьуз мумкинвал тувну.
Кьюб ражари дяви дубхьну, думу вахтна гъунши Чечен Республикайиъра гьял саламатуб дайи.
2006-2010-пи йисари Гьяжагъа Ибрагьимов Чечен Республикайин Шатой райондин дявдин комендатурайин оперативный отделениейин мялуматар тувру аьхюну офицерди лихуру. Думу Урусатдин Яракьлу Кьувватарин жергйириъ эскервалилан гъуллугъ апIуз хъюгъну, подполковникдин дережайиз удучIвна. Гьамус дугъаз ихь республикайин Каспийск шагьриъ улихьнаси ачмиш гъапIу дявдин частнан штабдин начальникдин заместителди гъуллугъ апIуб кьисмат гъабхьну.
Кавказдиъ хизандин багьалувал, марццивал гьар вахтна варитIан заанди бисура. Ав, сар кас фукьан уччвуди мяъли апIуз, тIирхуз, гъагъ хъючIюбхюз чалишмиш гъахьишра, мушваъ успагьивалин кьадар думукьан аьхюб дар, хъа кьюр кас сатIиди тIирхруган, гьяйран шулу. Хъа гъвалахъ вафалу уьмрин юлдаш хьуб варитIан аьхю бахт ву. Замира Камилпашаевнайин чан уьмрин юлдшихъди сабси айтIан ляхнарин жавабдар гъуллугънаъ лихури саки йицIуд йис шула. Хъа Замирайиз къанун уьбхру органариъ ляхин апIуз рюгьнан ижмишин ва хизандиз, веледариз аьзизвал, умунвал сатIиди наънан тувраш, гьелелиг ухьуз жинибди гъубзра…
Гьяжагъа ва Замира чпин бал’ин ва кьюр шур’ин уткан ву. Дурарин бай Тамерлан, абйир-бабарин рякъ кадабгъну, гьамусяаьтна Хабаровскдин сяргьятарин институтдиъ урхура. Шубар, чпин дадаси, зегьметниин юкIв алди тербияламиш шула. Дурар абйир-бабарин даягъ ва дамагъ ву. Ибрагьимоварин хизандин фикриинди, Кавказ Урусатдихьан жара апIбан экстремистарин терс метлебар гьяракатнаъ ирчнайи вахтна, жигьилариз дявдинна ватанпересвалин тербия тувуб, аьхю насларин рюгьнан мюгькамвалин дурар гъавриъ ауб чарасуз ву.




Категория: "Табасарандин нурар" | Добавил: Admin
Просмотров: 1064 | Загрузок: 0 | Рейтинг: 0.0/0
Всего комментариев: 0
ComForm">
avatar