Главная » Файлы » "Табасарандин нурар" [ Добавить материал ]

«Уьру хяд» орденарин сагьиб
26.02.2013, 21:46
Совет халкьди ва дидин Яракьлу Кьувватари, гитлерин Германия дагъитмиш дапIну, Ватандин асиллу дарувал бадали гъуху женгариъ чпин улихь дийибгънайи вазифа намуслувалиинди тамам гъапIну. Ватандин Аьхю дявдиъ СССР-ин миллионариинди агьалйири иштираквал гъапIну.
Думу къурхулу дявдиъ Дагъустандин вари миллетарин вакиларра аьхю кьадарнаъди иштирак гъахьну. Дурари къурхулу дявдин вари фронтариъ гьунарар улупну. Гъи ихь арайиъ яшамиш шулайи думу дявдин иштиракчйир тIубариинди гьисаб апIуз шулу. Цци февраль вазлин 2-пи йигъан Сталинграддин женгнаъ гъалиб гъахьихъан мина 70 йис тамам хьувал яркьуди къайд гъапIну, фицики Сталинграддин дявдиъ фашистарин асас кьушмар дагъитмиш гъапIну ва фашист чапхунчйир кьяляхъ хътакуз гъитну. 
Сталинграддин къурхулу женгариъ табасаран халкьдин вакиларра жанлуди иштирак гъахьну. Дурар гъи чIивиди амдар, вушра ухьу дурар кIваин уьрхюз буржлу вухьа. Гьяйифки, дурари улупу гьунарарикан яркьуди ктибтуз шулдар. Дурар ихь арайиъ амдрувал себеб вуди, дурарихъди сюгьбат гъабхузра шулдар. Военкоматариъ дурарикан имбу мялуматарра бегьемдар дар.
1921-пи йисан Табасаран райондин Куркакк гъулаъ бабкан гъахьи Ибад Идрисов 1939-пи йисан Ватандин улихь чан буржи тамам апIуз армияйин жергйириз гъягъюру. Гьадму йисан дугъу чаз ихтибар дапIнайи яракь ужуди аьгъю апIуру, женгнан ва политикайин гьязурлугвалин отличник шулу. Гьаддиз лигну И.Идрисовдиз 1940-пи йисан командованиейин терефнаан швнуб-саб ражари баркаллагь мялум апIбан кагъзар ва Гьюрматнан грамотйир тувну.
Дугъан эскервалин гъуллугъ ккудубкIайиз сад йис ккамиди ихь Ватандиин фашистар алархьуру ва дугъу чан жигьил уьмрин варитIан ужудар вахтар душмнихъди вуйи дявдиъ гьаъру. Дявдин сифте кIулариан цIин ялвигъ гъючIву Ибад Идрисовди аьхю игитвалар улупуру. Улупу игитвалариз лигну, дугъаз старшина звание тувру.
И.Идрисовди, ихь уьлкейин гизаф шагьрар ва гъулар душмнарихьан азад апIруган, фашистариз саб хайлин зарар тувну. 1943-пи йисан январь вазлиъ Сталинград шагьрин багарихь фашистарихъди женг гъабхурайиган дугъан хилиз зиян шулу. Госпиталиъ сагъ гъахьи И.Идрисов хъана Ватан бадали женгнаъ учIвру. Дугъу душмнихьан неинки ихь шагьрар ва гъулар, хъа гьацира Европайин саб жерге уьлкйир азад апIбакра чан пай кивну. Дяви ккудубкIуз цIиб вахт амиди, жигьил эскрин ликриз гъагъи зиян шулу.
Дявдиъ улупу игитвалариз лигну, К
уркакк гъулан агьали Ибад Идрисовдиз «Уьру Хяд» кьюб орден ва гизаф кьадар медалар тувну.
Категория: "Табасарандин нурар" | Добавил: Admin
Просмотров: 698 | Загрузок: 0 | Рейтинг: 0.0/0
Всего комментариев: 0
avatar