Главная » Файлы » "Табасарандин нурар" [ Добавить материал ]

УрчIвубпи ражну сабпи йишв
22.04.2011, 21:55
авторы:Гьяжимягьямед Гьяжиев

Апрелин садпи йигъан Табасаран райондин центральный больницайин актовый залиъ больницайин администрацияйи ва пишекрари 2010-пи йисан гъапIу ляхнин натижйир йивбан ва 2011-пи йисан гьял апIуз улихь дийигънайи месэлйирин гьякьнаан совещание гъабхьну.
Совещаниейиъ «Табасаран район» МР-йин администрацияйин главайин сарпи заместитель И.Ярялиев, РД-йин сагъламвалин министерствойин вакил ва Табасаран райондин больницайин куратор А.Хархаров, республикайин ФОМС-дин директорин заместитель Х.Баркаев, Табасаран райондин ФОМС-дин руководитель М.Акимов иштирак гъахьнийи.
Совещание ЦРБ-йин кIулин духтур М.Мягьямедовди ачмиш гъапIнийи. Дугъу чан улхбаъ Табасаран райондиъ сагъвал уьбхбан ляхнин гьякьнаан, ккудубшу йисан гъубху ляхникан ва гъябгъюрайи йисан агьалйирин сагъвал уьбхбаан чпин улихь дийигънайи месэлйирикан гъапнийи.
Чан улхбаъ М.Мягьямедовди къайд гъапIганси, райондин больницайин коллективди агьалйирин медицинайин гъуллугъар гьуркIбаъ чпин мумкинвалар ишлетмиш апIури, ужудар натижйир гъазанмиш апIура. Аьхиримжи йисари Табасаран райондин ЦБ-йиъ ужувлахьинди вуйи хайлин дигиш’валар арайиз дуфна. Гьамдихъди сабси Мирзамягьямед Ханмягьямедовичди саб ужуб цIийи хабарра тувнийи: «Республикайин районарин больницйирин арайиъ ихь больницайи урчIвубпи ражну сабпи йишв гъазанмиш гъапIну». Му хабар залиъ деънайидари гурлу гарччлариинди къаршуламиш гъапIнийи.
Совещаниейиъ хирургияйин отделениейин заведующий Ж.Зиявутдинов, гинекологияйин отделениейин заведующий З.Аьлигалбицева, эпидемиологияйин отделениейин заведующий М.Агъатаев, духтур-онколог М.Зульфикьаров, педиатр Аь.Маллакъурбанов, реанимацияйин отделениейин заведующий Аь.Сеферов, Дарвагъ гъулан духтурвалин амбулаторияйин кIулиъ айи А.Сефербегов удучIвну гъулхнийи. Дурари ккудубшу йисан чпи гъапIу ляхникан, хъуркьуваларикан ва гьеле гьял дарапIди улихь дийигънайи месэлйирикан ва гъябгъюрайи йисаз айи планарикан гъапнийи.
Совещаниейин аьхириъ А.Хархаров, Х.Баркаев, И.Ярялиев удучIвну гъулхнийи. А.Хархаровди чан улхбаъ райбольницайин кIули айидари пишекрарин ляхин ужуди албагнайиваликан, духтрари чпин вазифйир дережайиъди тамам апIурайиваликан, гьацира гъузнайи камиваларикан, гьял дапIну адру месэлйирикан, думу камивалар арайиан адагъуб чарасуз лазим вуйиваликан гъапнийи. ДумутIанна гъайри, Х.Баркаевди уч духьнайи духтрар РД-йин районарин больницйирин арайиъ Табасаран райондин ЦБ-йи сабпи йишв гъазанмиш апIбахъди тебрик гъапIнийи, гележегдиъра хъуркьувалар хьуб ккун гъапIнийи.

Категория: "Табасарандин нурар" | Добавил: Admin
Просмотров: 677 | Загрузок: 0 | Рейтинг: 0.0/0
Всего комментариев: 0
avatar