| Главная » Файлы » "Табасарандин нурар" | [ Добавить материал ] |
Ругуж бай - чемпион!
| 10.11.2011, 17:40 | |
| Ихь республикайин ад вари дюн'яйиъ тарабгъуз гъитрайи,
спортдиъ заан хъуркьувалар улупурайи спортсменарин арайиъ табасаран
баярира лайикьлу йишв бисура. Дурарин арайиан вуйи гъардшар Ислам ва
Къадирбег Шябановар, республикайиъси, Урусатдин спортдиин юкIв али
касарин арайиъра машгьур духьна. Ислам Шябанов спортдиин 2008-пи йисан машгъул гъахьну. Сифте вуди абйир-бабариз чпин бай спортдиин машгъул духьну зат ккундайи. Фицики дугъан сяътариинди гъягъру тренировкйири мектебдин дарсар дургъбаз манигъвал апIурайи. Аьхирки, шубуб вазлин тренировкйирихъан Исламди, Избербаш шагьриъ кикбоксингдиан кIули гъубшу Дагъустандин чемпионатдиъ иштирак духьну, сабпи йишв гъазанмиш гъапIиган, Шябановарин хулаз Исламдин тренер Арсен Рамазанов гъафнийи. Арсенди Исламдин абйир-бабариз балин мумкинваларикан, спортдиъ дугъан удукьуваларикан, жикъи вахтнан арайиъ дугъу улупурайи хъуркьуваларикан ктибтнийи. Думуган Исламдин адаш Рашидли чан велед кIваантIан спортдиин аьшкьламиш духьнайивал гьисс гъапIну ва дугъаз, мектебдин дарсариан кьяляхъ хъадрахъруси, спортдиин машгъул хьуз ихтияр тувну. Дидхъан мина 2 йисна гьацI вахт гъубшну. Гъи Ислам кигбоксингдиан республикайин, Урусатдин варитIан кIубан спортсменарикан сар духьна. БицIи вахтнан арайиъ Исламди кикбоксингдиан Дагъустандин Кубок бадали гъуху талитариъ 5 ражари гъалибвал гъазанмиш гъапIнийи. Спортдин му жюрейиан 2010-пи йисан ЮФО-йин чемпионатдиъра думу сабпи йишван сагьиб гъахьну. Думу талитар Кисловодск шагьриъ кIули гъушнийи. Кьибла Федералин округдин варитIан ужурсир спортсмен ччвур гъазанмиш дапIну, бицIи вахт гъябгъяйизра, Ислам гьадму йисан Саратов шагьриъ кикбоксингдиан Урусатдин Кубок бадали вуйи талитариъ иштирак шулу. Кубок, икибаштIан, ихь бали хъуркьувалиинди гъазанмиш гъапIнийи. Гъябгъюрайи йисан Ислам сифте Дагъустандин, хъасин Кавказдин Кубок бадали Избербаш шагьриъ кIули гъушу талитариъ сабпи йишвариз лайикьлу гъахьну. Му талитарихъан спортсмен СКФО-йин чемпионатдиъ иштирак шулу. - Му талитарин финалиъ узу Чечен Республикайин спортсмендихъди кичIихуз удучIвнийза. Ич арайиъ гъягъюрайи талитариъ узу улихь гьудучIвури гъахьнушра, судйири, рябкъюри-рябкъюри, чечен спортсмендиз заан баллар диври гъахьну. Думуган йиз тренерикра, судйирин гьякьсузвал, узуз гьякьсуз кьиматар диврайивал рябкъюри, яман хъял кубчIвнийи. Тренери узуз улупуб, узуз айи вари мумкинвалар фикриз гъадагъну, думу спортсмендиз узу ккагъуз гъитундайза. Аьксина, узу ачухъди, сар касра шаклу даршлуганси, дугъ'ин гъалибвал гъадабгъунза. БицIи вахтналан узуз думу спортсмендихъди сабансан ражну талитариз удучIвуб кьисмат гъабхьну. Му ражарира сабпи йишв бадали ич арайиъ нубатнан талит 2011-пи йисандин Урусатдин чемпионатдиъ гъубшнийи. Думу талитариъ судйири гьякьлу баллар диври гъахьну. Юкьбиб раундариъра узу чечен балиин рягьятди гъалибвал гъадабгънийза, - ктибтура Исламди. ЦIиб улихьна йигъари Ислам Италияйин Линьянно-Сабьядарро шагьриъ кIули гъубшу 2011-пи йисандин Европайин чемпионатдин гъалибчи гъахьну. Ва багарихьди ихь жигьил спортсмен вари дюн'яйин чемпионатдиз гьязур шула. Пуз ккундузузки, Шябановарин хизан Табасаран райондин Хючна гъул'ан Мягьячгъала шагьриз кюч дубхьну, магьа 12-пи йис гъябгъюра. Чпи Ругуж гъулан агьалйир ву. Исламди Мягьячгъала шагьрин 9-пи нумрайин мектеб-лицей 2010-пи йисан ужудар аьгъювалар ади ккудубкIну. Мугъан Мягьячгъала шагьриъ айи Кьибла Федералин университетдин юридический факультетдиъ урхури кьюбпи йис ву. Исламдин бицIину гъардаш Къадирбегканра са-кьюб гаф дарпиди гъузуз шулдар. Къадирбег байвахтнахъан мина футбол уйнамиш апIбиин аьшкь алир вуйи. Ва мектебдиъ урхури амиди думу, «Олимп» футболин бицIидаринна живанарин клубдин нападающий вуди, футболин талитариъ иштирак шула. Гьеле мектеб ккудубкIну адашра, дугъаз Урусатдин швнуб-саб футболин клубариан чпихьна гъюбан теклифар дивну. Гьаму йисан Къадирбег республикайин бицIидаринна живанарин футболин Маркаровдин клуб-мектебдин варитIан ужурсир нападающий ччвурназ лайикьлу гъахьну. Улихьна йигъари дугъаз ЦСКА футболин клубдин вакилари чпин клубдиз гъюбан теклиф дивну. Сифте вуди бали теклиф кьабул гъапIну. Хъа ЦСКА-йин живан футболистар гьязур апIурайи клуб-мектеб Ростов шагьрин саб гъирагъдиъ, хъа яшамиш шлу хал жара гъирагъдиъ ерлешмиш дубхьнайивализ лигну, дугъу теклиф кьяляхъ гъапIну. Фицики дугъу гьелелиг мектеб ккудубкIнадар. Хъа душваъ футбол уйнамиш апIруган, мектебдин дарсар дургъуз затра вахт гьубкIри шулдар. Къадирбегу сифте мектеб ккудубкIувал важиблу вуйиб гьисаб гъапIну. Ихь ватанагьли живан баяриз чпин кIваъ айи мурадарихъ хъуркьуз сагъвал, кьувват ва мумкинвалар хьуб ккун апIурхьа. | |
| Просмотров: 1493 | Загрузок: 0 | | |
| Всего комментариев: 0 | |