Главная » Файлы » "Табасарандин нурар" [ Добавить материал ]

Рягьимлувалин ва кюмекнан хил гьачIабккури
11.03.2011, 13:56
авторы:Алиева Феруза

«Сагъвал» милли проектдин улихь дийигънайи асас вазифйирикан саб агьалйирин сагъвал убхюб ва мюгькам апIуб ву. Гьаму месэлйир гьял апIбаъ намуслувалиинди чан вазифйир тамам апIурайи пишекрарикан сар Хив райондин ЦРБ-йин тяди кюмекнан медицинайин станцияйин аьхюну духтир Сийидмягьмад Сяидялиевра ву. Думу Хив райондин Зильдикк гъулаъ аьхю хизандиъ тербияламиш гъахьну. Мектеб ккудубкIну, 1967-пи йисан Ростов шагьрин мединститутдин лечебный факультетдик урхуз кучIвру. 1973-пи йисан диплом гъадабгъбахъан, думу Ульяновский областдиз хирургди гьаъру, хъасин ургуд йисан душваъ Маинский райондин ЦРБ-йин кIулин духтирди лихуру. Кьяляхъна йисари Сийидмягьмад Сяидялиев ихь республикайин жюрбежюр сагъламвалин идарйириъ лихуру.
- Думуган узу лихури гъахьи сагъламвалин идарйириъ вари жюрейин шараитар айи. Гьаци вушра, багъри ватандихъ юкIв шуйи. Хизандин гъайгъушнарра фикирназ гъадагъну, узу багъри юрдариз гъюз мажбур гъахьунза. Хив ЦРБ-йин онколог-хирургди лихури саки 32 йис вуйиз, - кIура дугъу. - Думу йисари узу шубуд агъзурилан заина операцйир гъухунза. Учуз айи шараитариъ сагъ апIуз мумкинвал айи аьзарлуйир узу сагъ апIуз зегьмет зигури гъахьунза. Хъа лап хатIалу лишан кади гъахьи кас, кьан дарапIди, республикайин онкологияйин диспансериз гьаърача. Экологияйин чиркинвал, папрус ва ички кьадарсуз ишлетмиш апIувал, мичIлишналан арайиз гъафи уьзрар аьхиризкьан сагъ дарапIувал – онкологияйин уьзрар арайиз гъюбан асас себебар ву, - давам апIура С.Сяидялиевди.
Бала-кьазайикк ккахъу агьалйириз саб кIуру кюмек тувуб хирургдин вазифа вуйиб гьисс апIури, Сийидмягьмад Гьяжимягьямедович чан ляхнин ери гъюблан-гъюбаз заан дережайиъ дивуз чалишмиш шула. Хив ЦРБ-йин коллективдин ва агьалйирин арайиъ аьхю гьюрмат гъазанмиш дапIнайи Сийидмягьмад Гьяжимягьямедовичди чан ляхниъ лазим вуйи аппаратар ва дармнар ишлетмиш апIура.
- Учуз медицинайин тяди кюмек тувбан вари мумкинвалар а. Анжагъ камиваларра адарди дар. Учуз айи машинар вари алатарихъди тяминди ву, анжагъ гъуларин рякъяриъ дурар ухди пуч шула. Дарпиди гъитуз шулдар, ЦРБ-йин ляхниъ деетурайи гъалатIар рякъруган, ляхин апIуз юкIв кадабтIуру. Медицинайин гъуллугъчйирин маважибар гьацира бицIидар ву, хъа учуз, мидланна савайи, думу дюз дардира тувра. Учуз коммуналин игьтияжариз туврайи пулин дакьатар вахтниинди туврадар. Хъа духтрариз стимулирующий пай вуди иливурайи 15% пулин дакьатарикан пубра герек адар. Гьаз-вуш думу сиягьдикра Хив райондин духтрар кадар. Му гъалатIарин гьякьнаан учу жюрбежюр тялукь йишвариз илтIикIнача, анжагъ йишвлан рибшвурайиб адар. Райондин улихь-кIулихь хьайидарин гафариинди, му игьтияжариз бюджетдиъ лазим кьадарнаъди пулин дакьатар жара апIура. Хъа дурар наанди гъягъюрайкIан? Дурарин эйсивал шли апIурайкIан? Му суалар жаваб адарди гъузра…
Ляхнин ужуб тажруба айи духтир Сийидмягьмад Сяидялиев намуслувалиинди зегьметнахьна янашмиш хьпаз, агьалйириз медицинайин кюмек тувбаъ чешнелу хьпаз лигну, 2006-пи йисан «Дагъустан Республикайин сагъламвал уьбхбан лайикьлу гъуллугъчи» ччвур, ЦРБ-йин руководствойин терефнаан швнуб-саб ражари грамотйир тувна.

Категория: "Табасарандин нурар" | Добавил: Admin
Просмотров: 635 | Загрузок: 0 | Рейтинг: 0.0/0
Всего комментариев: 0
avatar