| Главная » Файлы » "Табасарандин нурар" | [ Добавить материал ] |
Поэзияйи аьшкьлу дапIнайир
| 25.05.2011, 21:56 | |
| Ф.Аьлиева, ич хусуси мухбир, Хив район «Жигьил наслариз аьгъювалар ва тербия тувуб поэзияйихъди сигъ аьлакьайиъ дебккназа», - кIура Чювккерин кьялан мектебдин мялим Мягьмудбег Гъазимягьямедовди. Гъюзимбу гележег яркьу уьмриз гьязур апIбаъ мялимдин пишекарвалин дережайи аьхю йишв бисура. Зигьимлу, аькьюллу, ужуб тербия хъайи выпускникар – мялимди зигурайи зегьметнан натижа ву.Чпин пишейиин юкIв алди, вазифйир намуслувалиинди тамам апIурайи мялимар Хив райондиъра хайлин а. Чювккерин кьялан мектебдин тешкилатчи, шиклар зигбан ва зегьметнан дарсар киврайи мялим Мягьмудбег Сейфулагьович Гъазимягьямедов (шиклиъ) дурарин жергейиан ву. БицIи вахтнахъан мина мялимвалин пише лайикьлуб вуди гьисаб апIурайи Мягьмудбег Сейфулагьович, мектеб ккудубкIур, Дербент шагьрин педучилищейиз урхуз гъягъюру. Юкьубпи курснаъ урхури айиган, думу армияйиз гъушну. Ватандин улихь чан буржи тамам дапIну, дугъу урхуб башламиш гъапIну. Педучилище хъуркьувалиинди ккудубкIу жигьил пишекар Хив райондин ЦIудихъ гъулан бегьем дару кьялан мектебдиз ккергъбан классарин мялимди гьаъру. Думу мектебдиъ дугъу мялимвалин зегьметнан рякъюъ садпи гамар алдагъуру. Яркьу уьмриз диб ккиву сабпи класс, сабпи дарс мялимди машнакк инчI ккади кIваина хура. Амма аьгъюваларихъ юкIв хъайи Мягьмудбег Сейфулагьович мид’ин сикин гъахьундар. 1987-пи йисан ДГПУ-йин тарихдинна правойин факультетдик заочно урхуз кучIвру. ЦIудхъарин кьялан мектебдиъ 17 йисан мялимвал дапIну, 2004-пи йисан Мягьмудбег Гъазимягьямедов багъри гъулан мектебдиз гъюру. Гьаддихъан мина думу Чювккерин кьялан мектебдин тешкилатчиди, шиклар зигбанна зегьметнан дарсарин мялимди лихура. Мягьмудбег Сейфулагьович мектебдин тажрубалу мялимарикан сар ву. «Образование» милли проектдин бинайиин алди, М.Гъазимягьямедов 2009-пи йисан «Урусатдин ужурсир мялим» конкурсдиъ иштирак ва гъалиб гъахьну. Му Президентдин грантдин сагьиб ву. Му мялимдинна урхурайидарин ужудар аьлакьйир а. Мягьямудбег Гъазимягьямедов, баяр-шубариз аьгъювалар туврайи пишекарси, гьам тербиячира, насигьятчира ву. Мялимвалин пишейихъди сабси, мугъу 1987-пи йислан мина шиърарра дикIура. Мягьмудбег Гъазимягьямедовдин шиърар райондин «Аку хяд» газатдин, «Ппази» журналин машариъ чап дапIна. Гьамус мугъаз урус чIалнииндира дидикIнайи хайлин шиърар а. Мягьмудбег Сейфулагьовичдин мялимвалин зегьметназ, поэзияйин яратмишариз тялукь вуди, Хив РУО-йиъ мурччв тешкил дапIна. | |
| Просмотров: 1031 | Загрузок: 0 | | |
| Всего комментариев: 0 | |