Главная » Файлы » "Табасарандин нурар" [ Добавить материал ]

Нирар хайирназ илтIикIури
19.07.2011, 00:08
Инсан, чан хал, гъул гъибтну, жара йишвариз гъягъюз мажбур апIру швнуб-саб жюрейин багьна шулу.
Ихь халкьдин тарих дицдар гьядисйирихъди девлету ву: фуж дявдиъ иштирак духьну, фуж гаш`вали улихь гьитну, фуж йисир духьну, фуж ляхин абгури гъул`ан удучIвну гъушну.
Гъийин девриъ табасаран баяр ляхин абгури дюн`я вуйибси тIиркIура. Гьаму агьларикан сар Шихмягьямед Сеидович Шихмягьямедовра (шиклиъ) ву. Думу 1956-пи йисан СертIил гъулаъ бабкан гъахьну, гьамус Огни шагьриъ яшамиш шула. Дугъу, 1978-пи йисан Куйбышевдин энерго-строительный институт ккудубкIну, тикилишчивалин кесп гъадабгъну. Чан зегьметнан рякъ ухьуз варидариз аьгъю Чиркей ГЭС-дилан ккебгъну. Гьаддихъан мина, нирар гьадатIури, дурарин кьувват инсандин хайирназ илтIибкIура.
Шихмягьямед Сеидовичдин иштираквалиинди Миатлийин, Ирганайин ГЭС-ар, Чебоксарыйин ТЭЦ тикмиш гъапIну. Дидланна савайи, думу Таджикистандиъ Санг–тундыйин ГЭС тикмиш апIбаъ иштирак гъахьну. Ихь ватанагьлийикан бетондин цалар апIру, нирарикан даграр апIру уста духьна. Дугъан албагу хизандиъ 3 велед аьхю гъахьну. Гьамус худларра духьна. Гьамусяаьт  дугъу «Чиркей ГЭС стройдиъ» «СМУ Ирганайская ГЭС» фирмайиъ ляхин апIура. Шихмягьямедовдиз РСО-Аланияйиъ Зарамагдин ГЭС-ар  дивуз табшурмиш дапIна. Ду–шваъ, саб дагар (плотина) дапIну, 3 ГЭС аьмалназ хуз йикьрар дапIна.
Гьаму вари ляхнарин проектар, Ленгидропроектдиъ дизигну, гьисаб дапIну мина хътаура. Думу рабочий дестейин кIули айир Ирина Георгиевна Бельченко (шиклиъ) ву. Му яркьу чюллериъ урус дишагьлийи ихь баяриз нирар гьадатIуз кюмек апIура. Ирганайдин, Гоцатлийин ва жара ГЭС-арин проектар мугъан регьберваликкди дюзмиш гъапIну.
- Му дагълу баяр узуз гъардшарси духьна, мурарихъди гизаф уьлин кьацI гъипIунза, - кIура Ирина Георгиевнайи.
Гъийин йигъан Шихмягьямед Сеидович Зарамагдиъ тикилишчивалин участокдин начальникди лихура. Мугъан хиликк 80 устайи ляхин апIура. Устйирин арайиъ мугъаз аьхю гьюрматра а.
- Му кас инсандин гъавриъ шлур, чахьан шлубси гьюрмат апIрур ву, - гъапнийи Къурбаняли кIуру устайи.
Ш.Шихмягьямедовди,  гъурабатдиъ жвуван ватанагьлийирин гъайгъу зигури, ляхнин тувнайи табшуругъ (план) тамам апIури, чаз сикинвал аьгъдарди зегьмет зигура. Му гъайгъушнари Дагъустандин агьалйириз ляхин тувра, хъа гъийин девриъ думура цIиб дар. Гъит, мугъан ва мугъахъди лихурайи баярин метлебар тамам ишри!
Категория: "Табасарандин нурар" | Добавил: Admin
Просмотров: 812 | Загрузок: 0 | Рейтинг: 0.0/0
Всего комментариев: 0
avatar