Главная » Файлы » "Табасарандин нурар" [ Добавить материал ]

Мурариинди мектеб дамагълу шула
19.06.2013, 22:24

  Гъи гьаму макьалайиъ мектебдин яшнаъ айи живанарикан улхуз ккундузуз, фицики дурарин арайиъра чпиинди ихь халкь уткан апIурайи вакилар гизаф а.
  Гьадрарикан сар вуди узуз Табасаран райондин искусствйирин мектебдин ученик Назим Гьяжикъурбанов улупуз ккундузуз. Дугъу Пилгъарин кьялан мектебдиъ урхура.
Улихьна йигъари Мягьячгъала шагьриъ Р.Гьямзатовдин ччвурнахъ хъайи Милли библиотекайин выставкйир гъахру залиъ РД-йин культурайин Министерствойин регьберваликкди Дагъустандин районариъ айи искусствйирин мектебариъ урхурайидарин арайиъ «Хьадукран хиялар» конкурс кIули гъубшнийи. Думу конкурсдиъ гьаму шиклиъ ухьуз рякъюрайи Назим Гьяжикъурбановдира иштираквал гъапIнийи.
  Назимди думу конкурсдиз чан скульптурайин шубуб ляхин -«Булагъдихь», «Кьабир», «Кьавлар» - гъвандиан адатIу композицйир адагънийи.
  Конкурсдин жюрийи мугъан яратмиш апIбан ляхнариз ужуб кьимат тувнийи. Хъа «Булагъдихь» кIуру композицияйиз лапра заан кьимат тувнийи. Думу композиция заан устадвалиинди ва дикъатлувалиинди тамам дапIнайиб вуйи.
  Вари терефариан ахтармиш апIбан кьаляхъ, жюрийин членари дидиз варитIан заан кьимат тувру – конкурсдин «Скульптура» номинацияйиъ му яратмиш апIбан ляхни 1-пи йишв гъазанмиш апIуру. Гьаци, Назим Гьяжикъурбанов сабпи дережайин Дипломдиз ва кьиматлу пешкешназ лайикьлу шулу.
  Узу Табасаран райондин искусствйирин мектебдин директор Ш.И.Аьлисултановдихьна илтIикIнийза. Ич арайиъ гъабхьи сюгьбатнаъ дугъу къайд гъапIнийи: «Низам Гьяжикъурбанов ич искусствйирин мектебдиъ урхури юкьуд йис ву. Думу мициб заан хъуркьувалихьна гъюбан себебар а. Скульптура дугъан юкIв али пише ву. Дугъу мялимари чаз туву гьарсаб насигьятнакан мянфяаьт ктабгъура. Назим улихь дивнайи метлебнахьна дурумлуди гъягърур ва ляхнихьна жавабдарвалиинди янашмиш шлур ву. Дугъу  райондин конкурсариъра гьарган пешкешнан йишвар гъадагъуру. Думу ляхниъ ягъурлу хьуб ккун апIураза».
  «Хьадукран хиялар» кIуру республикайин конкурсдиъ ич мектебдиъ аьгъювалар гъадагъурайи жара баяр-шубарра иштирак гъахьну. БатIрикан гъабар апIбан «Ругдин гъабар апIрудар» номинацияйиъ Ильяс Гьяйдаров ва Амина Рашидова, «Убхуб» номинацияйиъ Сусанна Гьясанова ва Наида Мягьямедова иштирак гъахьнийи.
  Дурар пешкешнан йишвариз удучIвундаршра, жюрийин членари дурарин ляхнариз лайикьлу кьимат тувну ва конкурсдиъ жанлуди иштирак хьпаз лигну, Гьюрматнан грамотйириинди лишанлу гъапIну». 
  Цци апрель вазлин 2-пи йигъан Мягьячгъала шагьриъ багъри юрд аьгъю апIбаан яратмишарин ляхнар уьрхбан республикайин конкурсдин финалин тур кIули гъубшнийи. Дидин иштиракчйир республикайин шагьрарин, районарин мектебарин 7-11-пи классариъ урхурайи баяр-шубар вуйи. Дурар «Йиз райондин (шагьрин) артмиш,валин тарих» муниципалин конкурсариъ гъалиб гъахьидар вуйи.
  Конкурс кьюб пайнаъ кIули гъубшнийи. Гъядягъбан сабпи пайнаъ тувнайи темайиан багъри юрд ахтармиш апIбан доклад гьязур дапIну ккундийи. Конкурсдин 2-пи пайнаъ думу яратмиш апIбан ляхин дюбхну ккундийи. Яратмиш апIбан 86 ляхникан уьрхюз ужударстар 37 ляхин гъядягънийи.
  Конкурсдин жюрийи гъиву натижйириинди, улупнайи 25 балликан 24 балл гъазанмиш дапIну, Табасаран райондин Туриф гъулан кьялан мектебдин 9-пи классдиъ урхурайи Аьбдулагь Нурмягьямедов кьюбпи йишваз лайикьлу гъахьнийи. Республикайин конкурсдиъ 2-пи йишв гъазанмиш апIбаз лигну, Аь.Нурмягьямедов РД-йин илимдин ва образованиейин Министерствойин терефнаан кьюбпи дережайин Дипломдиинди ва кьимталу пешкешариинди лишанлу гъапIну. 
  Март вазлин 24-пи йигъан Мягьячгъала шагьриъ бабан чIалариан республикайин олимпиада кIули гъубшну. Думу олимпиадайиъ Табасаран райондин ТIаттларин СОШ-дин 11-пи классдиъ урхурайи Милана Рамазановайи 1-пи йишв гъибисну.
  Ихь жигьиларин хъуркьуваларикан улхури, узуз Хючнаарин сабпи нумрайин кьялан мектебдин 10-пи классдиъ урхурайи Хадижаханум Къазиевайиканра саб-кьюб гаф пуз ккундузуз. Дугъан классдин руководитель Гюльмира Уружбеговнайин гафариинди, Хадижаханумди му урхбан йисан саб предметдианра саб ражнукьан «юкьуб» кьимат гъадабгъундар, вари «хьубар» ву. Классдин журнализ гъилигиган, узу му ляхнин инанмиш гъахьнийза. Дугъриданра, журналиъ айидар вари «хьубар» вуйи.
  - Хадижаханумди Табасаран райондин УО-йи жюрбежюр предметариан тешкил апIурайи вари олимпиадйириъ иштираквал апIура ва пешкешнан йишвар гъадагъура. Мугъаз вари предметариан заан аьгъювалар гъадагъуз удукьувалар а, - къайд гъапIнийи Гюльмира Уружбеговнайи.
  Яв варитIан ккуни предмет фу вуяв, кIури, узу гьерхган, Хадижаханум Къазиевайи гьамциб жаваб тувнийи: «Узуз вари предметар ккундузуз. Дурар вари лазим вуйидар ву, хъа узу урус чIалниинди шиърарра дикIураза, дупну, дугъу узуз чан шиърарин бицIи гъварч (6 эсер) кайи «Табасарандин сес» газат улупнийи.
Газат дибисну, узу душваъ тувнайи шиърар гъурхунза. Шиърар кьабул гъахьнийзуз. Хадижаханумди чан шиърар дадайиз, табиаьтдиз, багъри ватандихьна айи чан ккунивализ ва жара темйириз бахш дапIнайи.
  Йиз фикриан, зиихъ къайд дапIнайи хъуркьувалар бицIидар дар. Табасаран райондин жигьилари жюрбежюр жара йишвариъра хъуркьувалар гъазанмиш апIура. Ихь жигьиларин думу хъуркьувалариинди ухьу дамагъра апIурахьа.
Категория: "Табасарандин нурар" | Добавил: Admin
Просмотров: 1258 | Загрузок: 0 | Рейтинг: 0.0/0
Всего комментариев: 0
ComForm">
avatar