Главная » Файлы » "Табасарандин нурар" [ Добавить материал ]

Мугъан урчIвуцIур йис ву
21.10.2011, 23:24
  Зилли гъул'ан Ватандин Аьхью дявдиз 75 кас гъушнийи, гьадрарикан 21 кас кьяляхъ гъафну, имбудар дявдин женгариъ гъийихну. Далу терефнаъ лихури гъахьидаризра рягьятди гъабхьундар. Дурарин арайиан вуйи ич гъулан агьали Сусан Аслановайи думу йисарикан улариъ нивгъар ади гафар апIуру.
   Сусан Асланова 1921-пи йисан 1-пи июли Табасаран райондин Зилли гъулаъ бабкан гъахьну. Багъри гъулаъ ккергъбан классарин мектеб ккудубкIу дугъу аьраб чIалниинди бикIуз, урхуз ужуди гъудубгънийи. Ватандин Аьхю дявдин читин йисари Сусан Асланова багъри гъулан колхоздиъ чюлин жюрбжеюр ляхнариин машгъул гъахьнийи. Чюлин ляхниз гъягъюбтIан савайи, дугъу колхоздин гьисабчийин вазифйирра тамам апIуйи.
   Дявдин улихьна, яни 1940-пи йисан, ич гъулажви ТIагьирбег Аслановдихъди дугъу чан хал-хизан ккебгънийи. Мугъан жилир ТIагьирбегра багъри колхоздиъ, совхоздиъ йицIуд йисариинди бригадирди лихури гъахьнийи. Гъалибвалин Йигъ мугъан лапра ужуди кIваин алми.
   - Дурар кIваълан гьауз шлу йигъар дар. Гъалибвалин Йигъаз дявдин йисари миллионариинди инсанар ккилигурайи. Фашистариин ихь уьлке гъалиб гъабхьну кIуру хабар кубкIиган, инсанарин уларилан шадвалин нивгъар гъягъюйи. Узу йиз уьмриъ думу варитIан шаду йигъси гьисаб апIураза, гьаз гъапиш дявдин читин ва залум йисари инсанар гъаллаж дапIнайи, - гъапнийи ич сюгьбатнаъ Сусан Аслановайи.
   Дявдин ва дидин кьяляхъна йисари гъизигу марцци зегьметназ лигну, Сусан Асланова юбилейин вари медаларихъди, Жуковдин медалихъди ва жара пешкешарихъди лишанлу дапIна. ДумутIанна гъайри, Гъалибвалин Йигъахъди аьлакьалу вуди, мугъан адресназ Урусатдин Президент Д.Медведевдин къул алди телеграммара гъафну.
   Сусан ва ТIагьирбег Аслановари йирхьур бицIир аьхю ва тербияламиш гъапIну. ТIагьирбег Аллагьдин рягьматдиз гъушну. Сусан бабаз 19 худул, 26 гудул а. Чан аьхю хизандиин думу гизаф разиди ву. Гъябгъюрайи йисан июль вазлин садпи йигъан Сусан Аслановайин бабкан духьну урчIвуцIур йис тамам гъабхьну. Аьхю яшнан агьалйир халкьдин берекет ва утканвал ву. Дугъаз гележегдиъра жандин сагъвал, кIван шадвал, чан багъридарин терефнаан гьюрмат хьуб ккун апIурхьа.
Категория: "Табасарандин нурар" | Добавил: Admin
Просмотров: 720 | Загрузок: 0 | Рейтинг: 0.0/0
Всего комментариев: 0
avatar