Главная » Файлы » "Табасарандин нурар" [ Добавить материал ]

Марцци гьиссари абцIнайи юкIв
26.02.2013, 21:37


  Табасаран жигьиларин арайиъ Урусатдин ва Дагъустан Республикайин улихь хьайи вузариъ заан аьгъювалариз урхурайи студентар гизаф а. Ужуб образование гъадабгъбахъди аьлакьалу вуди, дурариз чпин уьмриъ кадабгънайи рякъюъди гъягъюзра рягьятди алабхърубдиин умудлу вуза. Фицики, тIагъру дарапIди, китабар урхбиин, аьгъювалар гъадагъбиин машгъул вуйи хайлин касар гъи бажаранлу мялимар, аьлимар, политикар, духтрар духьна.  

   Ужудар аьгъювалариз урхурайи студентарихьна хътакури, узуз сар гюрчег, гьаммишан кIвантIарикк шаду инчI ккайи ва саламат хасиятнан шуркан ктибтуз ккундузуз. Думу Фатима Акперова ву. Фатимайихъди узу сифте ихь шаир Эльмира Аьшурбеговайи таниш гъапIнийи.
   - ЦIийи йис улубкьайиз улихьна учу «Табаристан» ва «Ихь хал- Табасаран» рягьимлувалин фондарихъди сатIиди тешкил дапIнайи конкурс гъубхнийча, - ктибтура Эльмира       Аьшурялиевнайи. – Думу конкурсдин номинацйирикан саб «Бабан чIалнаан варитIан ужур студент» кIуру номинация вуйи. Ихь миллетдин вакиларигъ варитIан ужур, бабан чIалнаан заан аьгъювалариз урхурайи студент фуж вуш аьгъю апIури, учу ихь республикайин жюрбежюр вузариъ ва Дербентдин педколледждиъ урхурайи ихь студентарин арайиъ конкурс гъабхуз йикьрар гъапIунча. Дербентдин педколледждин, Мягьячгъала шагьриъ айи ДГПУ-йин Дагъустандин чIаларин филологияйин факультетдиъ ва ДГУ-йин филологияйин факультетдин дагъустандин чIаларин отделениейиъ урхурайи студентар сатIиди уч дапIну, дурарихьна конкурсдин ляхнар тамам апIуз тувунча. Пуз ккундузузки, натижйири узу лап мюгьтал гъапIну. Хайлин ихь студентари конкурсдин ляхнар заан кьиматназ гьял гъапIну, - гъапну Эльмира Аьшурбеговайи. Дугъу ктуху студентарин арайиъ Фатимара айи. Фатима Акперовайи Дербентдин педколледждиан вуйи Исаева Залинайихъди му конкурсдин кьюбпи йишв пай гъапIну.
   Фатима Акперова 1993-пи йисан Хив райондин Ашага Яракк гъулаъ бабкан гъахьну. Мектебдиъ урхури амидира Фатимайи республикайин дережайиъди гъягъюрайи швнуб-саб олимпиадайиъ иштираквал гъапIну. Дурарикан вуди тарихдиан, обществознаниейиан, урус чIалнаан ва литературайиан вуйи олимпиадйириъ дугъу заан натижйир улупну. Фатимайи ДГУ-йин филологияйин факультетдин дагъустан чIаларин отделениейин 2-пи курснаъ урхура. Заан урхбан идарайиъ урхури, гьелелиг дугъан 2-пи йистIан даршра, думу хайлин мялимариз заан аьгъювалариз урхурайи студенткаси таниш ву.
   - Гьарсар инсандиз варитIан багьа шубуб багьалугъ а, кIури шулу. Дурар Ватан, Хизан ва Багъри чIал ву, - кIура Фатимайи.
   -Гьаму шубуб багьалугъдикан гъи варитIан гъагъи гьялнаъ абхънайиб бабан чIал ву. Гьаци вуйибдиин узу, гъул,ан шагьриз урхуз гъафиган, инанмиш гъахьунза. Фицики, мисалназ, саб гъул,ан вая саб райондиан вуйи жигьилар чиб-чпихъди бабан чIалниинди ваъ, урус чIалниинди улхуру. Йиз фикриан, сифтена-сифте бабан чIалназ гьюрмат дапIну ккунду. Бабан чIал гьарху, багъри чIалназ гьюрмат апIуз даккни касдихьан ватандиз, хизандиз бажагьат гьюрмат апIуз шул. Ихь чIал, наан улхурушра, фурсра, дамагъра апIури улхуз нубат али чIал ву, - давам гъапIну дугъу.
   Фатимайи гьацира студентвалин уьмрикан, табасаран чIалнаан студентариз вуйи китабар лап цIибдитIан адрувалихъди аьлакьалу вуди, урхуз, бабан чIалнаан аьгъювалар гъадагъуз цIиб гъагъиди вуйиваликан ктибтнийи.
   - БицIи вахтнахъан мина мялим хьуз кьаст гъапIнийза. Университет ккудубкIубси, бабан чIалнан мялимди лихуз гъягъюрза. Узуз бицIидариз дюзди урхуз-бикIуз улупуз гизаф ккуниб вузуз. Йиз фикриан, варитIан гьюрмат айи пишйирикан мялимвалина духтирвали варитIан важиблу йишв бисура. Духтри инсандин сагъвал къайдайиз хуру, хъа мялимари думу инсан «мучIувалиан акувализ» адауру, - аьлава гъапIну Фатимайи.
  
Фатима гьякь ву. Гьаму марцци юкIв, ачухъ фикрар айи табасаран шураз чан уьмриъ варитIан кIваан вуйи хиялар, умудар тамам хьувал, уьмрин шаду гьиссарин ва бахтнан сагьиб хьувал ккун апIурхьа.
Категория: "Табасарандин нурар" | Добавил: Admin
Просмотров: 660 | Загрузок: 0 | Рейтинг: 0.0/0
Всего комментариев: 0
avatar