Главная » Файлы » "Табасарандин нурар" [ Добавить материал ]

Ляхин апIуз наана гъягъюру?
28.03.2011, 13:31
авторы:Саидова Джамиля

Гъийин читин, агьалйир ляхнихъди кьитдитIан тяминди вуйи, вахтна инсанди чав гъадабгънайи пишейиан ляхин апIураш ва дугъан диплом фициб рангнануб вуш асас дар. Асасуб инсан ляхнихъди тямин апIувал ву. Мушваъ кьюб вариант а. Ясана, асккан маважиб гъадабгъури, ктабгъу пишейиан ляхин апIуз гъягъюб, дарш дилаварарин хусуси тешкилатариъ, цIиб артухъси пул гъазанмиш апIури жюрбежюр ляхнар апIуб. Хъа аьхюну пай агьалйириз государствойин марцци, сикин ляхинра аьхю маважибра сабси ккунди шулу. Шаксузди, дици шлиз-вушра ккунду! Думу вари хьуз мумкин ву. Хъа дишлади ваъ! Гьяйифки, ухьуз варидариз мялум вуйиганси, ихь республикайиъ ужуб ляхин гьеле-меле бихъурадар.
Мягьячгъала шагьрин агьалйир ляхнихъди тямин апIру Центрин агьалйириз ляхин тувбан отделин пишекар, ихь ватанагьли Наргиз Агъабаевайин гафариинди, саб Мягьячгъалайиъ ляхниз ккилигурайи 705 бикар гьисабназ гъадагъна. Мурарикан 70% вузарин дипломар хьайидар ву.
«Хъа му 70%-дикан аьхюну пай юристар, экономистар, бухгалтерар ву», - къайд гъапIну дугъу.
- Фици?! Жара йишвариъ аьгъдарзуз, хъа ихь республикайиъ юридическийна экономический факультетар адлудар ву, кIури, жигьилар душварик урхуз кучIвуз чалишмиш шулаки? – мюгьтал духьну, суал тувнийза Н.Агъабаевайиз.
- Гьаму факультетарин выпускникарикан гьацIаризра чпин пишейиан ляхин дибрихърайиган, дурар адлудар ву, кIури, гьапIрухъа?! Статистикайи улупурайиганси, гъюзимбу 5-7 йисан му пишекрариз тIалаб хьибдар, - гъапнийи Наргиз Агъашириновнайи.
- Гьамусяаьтна фицдар пишйир тIалабнаъ а?
- Жикъиди Мягьячгъала шагьрикан кIуруш, тIалабнаъ айи пишйирик гизафси заводдиъ лихру пишекрар, тикмиш апIрудар, медицинайин гъуллугъчйир, инжинерар кахьра. Ляхин туврайирин тIалабариз лигну, учу бикарар лазим вуйи пишейиан аьгъювалар гъадагъуз урхуз гьаърача.
- Маиф бикарарикан фу пуз шулу?
- Гъийин йигъаз Мягьячгъала шагьриъ 160-кьан маиф бикарар гьисабназ гъадагъна. Ляхниъ дугъужвуз ккунди айи маиф касариз гьарсаб карханайиъ квота улупна. Гьарсаб карханайиъ улупнайи кьадарнаъди дицдар касар лихура. Хъа дурар ляхниз артухъди гъадагъуз гъитуз учхьан ляхин туврайидариз гуж апIуз шулдар.
Мидланна гъайри, Мягьячгъалайин агьалйир ляхнихъди тямин апIру Центри, жара карханйириз маиф касар ляхниз гъадагъбан бадали, пулин дакьатар жара апIура. Гьаци, гъубшу йисан ич финансированиейиинди 60 кас ляхниз гъадагъну. Жара гафариинди, дурариз маважиб ич Центриан туври гъахьну. Дурарикан гизафдар палтар дирхрударди ляхниз гъадагъуру.
- Наргиз Агъашириновна, агьалйир ляхниз гъадагъбан, ляхин ужу алапIбан бадали, фицдар серенжемар гъахурачва?
- Жюрбежюр программйир кьабул апIури, ич ляхин яркьу, туврайи гъуллугъарин ери ужу апIурача. Гъи учура Мягьячгъала шагьрин агьалйириз вуйи саб программа тартиб дапIнача. Сабан думу республикайиъ кьабул апIуру, хъасин учухь ляхник кипруча. Дидиз «Мягьячгъала шагьрин агьалйир ляхнихъди тямин апIуз тясир тувбан программа» ччвур тувна. Гьацира, гьаму кьанди «РД-йин зегьметнан рынокдиъ гъизгъинвал цIиб апIбан 2011-пи йисаз вуйи программа» кьабул дапIна. Му программйирин метлеб бикар ватанагьлийирин кьадар цIиб апIуб ву.
15-20 йис улихьна вузарик урхуз кучIврайи мектебарин выпускникарин кьадар 20-30%-тIан дайиш, гьамус, РД-йин Минобразованиейин мялуматариинди, урхуз кучIврайидарин кьадар мектебарин выпускникартIан артухъ ву. Вузарин 30-35% выпускникаризтIан чпин пишейиан ляхин бихъурадар. Имбудар магазнариъ, базрариъ ва гь.ж. йишвариъ ляхниъ дийигъура, ясана зат ляхин адарди гъузра. Бязи вахтари чпи гъадабгънайи пишейин багахьнакьан дару ляхин гъабхьишра, ляхниз гъягъюра, -аьлава гъапIнийи Наргиз Агъашириновнайи.
Хъа ихь абйири кIурайиси: «Чекмечийихьан уьл убжуз даршул, хъа уьл убжрурихьан чекмйир дирхуз даршул».

Категория: "Табасарандин нурар" | Добавил: Admin
Просмотров: 668 | Загрузок: 0 | Рейтинг: 0.0/0
Всего комментариев: 0
avatar