Главная » Файлы » "Табасарандин нурар" [ Добавить материал ]

Кьувватнан аьршдиз удучIвну
15.01.2013, 00:16

автор: Гьяжимягьямед Гьяжиев 

набиев
Гъи Табасаран райондин спортсменарин арайиъ жюрбежюр дережайин талитариъ пешкешнан йишвар гъадагъдар ва спортдин жюрбежюр кичIихбариан, пучIу атлетикайиан, райондинси, республикайинра, Урусатдинра чемпионар а. Мидланна гъайри, ихь баяри, вари халкьарин арайиъ уйнамиш апIру талитариъ иштирак шули, европайин ва дюн,яйин чемпионвалин ччвурар гъазанмиш апIура.  
Табасаран райондин спортсменари мицисдар хъуркьувалар гъазанмиш апIурайивал райондин ва республикайин улихь-кIулихь хьайидари спортдиз лайикьлу фикир туврайивалин натижа ву. Спортдихьна ихь жигьиларин аьхю аьшкь а. Гьадди дурар хъуркьуваларихьна гъахура.
- Улихьна йигъари Майкоп шагьриъ 16-17 йисан яшнаъ айи живанарин арайиъ аьдати ушуйиан Урусатдин чемпионат кIули гъубшну. Думу талитариъ Урусатдин жюрбежюр регионариан 15 командайи иштираквал гъапIнийи, гьадму гьисабнаан 115 спортсмендикан ибарат вуйи Дагъустандин командайира иштираквал гъапIну, –мялум апIура думу талитариз Табасаран спортсменар хъади гъушу тренер Назим Гьяжиевди. 
- Дагъустандин командайин дахилнаъ шубур табасаран баярра айи: Шамил Небиев, Запир Исмяилов, Муса Ражабов. Дурар тяриф апIбаз лайикьлу ву, - давам гъапIнийи Назим Гьяжиевди. 
Узу Шамил Небиевдихъди ва дугъан тренер Назим Гьяжиевдихъди сатIиди сюгьбат гъубхнийза. Дурарин гафариинди, ихь шубрид спортсменарира чпин гъагънан жюрейиъ пешкешнан йишвар гъазанмиш гъапIну. Шамил Небиевди му талитариъ 75 кг. гъагъ айи спортсменарин арайиъ кьюб кичIихуб кIули гъухну ва дурариъ кьюбибдиъра гъалиб гъахьну. Запир Исмяиловра чав гъуху кьюбби кичIихбариъ гъалиб гъахьну. Хъа Муса Ражабовди 65 кг. гъагъ айи спортсменарин арайиъ шубуб кичIихуб гъухну. Дурарикан кьюбдиъ думу гъалиб, сабдиъ – магълу гъахьну. Натижайиъ Ш.Небиев ва З.Исмяилов сабпи йишван, хъа М.Ражабов – кьюбпи йишван сагьибар гъахьну. 
- Му талитар Адыгеяйин госуниверситетдин спортзалиъ кIули гъушнийи. Душваъ спортсменариз ужудар шараитар яратмиш дапIнайи. Уьмуми натижйириинди му талитариъ 1-пи йишваз Дагъустандин команда удубчIвну, фицики ихь спортсменарин аьхюну пайну пешкешнан йишвар гъазанмиш гъапIну. Мидланна гъайри, сабсана рази хьуз шлу мялумат тувуз ккундузуз. Му ражну Майкопдиз гъушу Ш.Небиевди спортдин «шуайцзяо» дисциплинайин талитариъра иштираквал гъапIну ва пешкешнан 2-пи йишваз удучIвну. Натижайиъ думу кьюб медалин (гъизилин ва арсран) сагьиб гъахьну. Урусатдин чемпионатдиъ му бицIи хъуркьувал дар. Майкоп шагьриъ гъабхьи чемпионатдиъ сабпи йишвар гъидису спортсменариз 2013-пи йисан апрель-май вазариъ ушуйиан Гонконгдиъ гъябгъру дюн,яйин чемпионатдиъ иштираквал апIуз путевкйир тувну, - къайд гъапIну Н.Гьяжиевди.
Шамил Небиев Табасаран райондин ГьепIларин кьялан мектебдин 11-пи классдиъ урхурайи ученик ву. 16 йисан яшнаъ айи живан бали спортдиъ гъазанмиш апIурайи хъуркьувалар Небиеварин хизандиз, дугъу урхурайи мектебдин коллективдиз ва вари Табасаран райондиз аьхю хъуркьувал ву. Гьаддиз дугъан адаш Умалатди (ОВД-йин дознаниейин отделин начальник), дада Шигьназди (ГьепIларин кьялан мектебдин мялим), аьхю аба Рустамди чпин бай ва худул талитариз гъягъруган лазим вуйибдихъди тямин апIуру.
Гьамусяаьтна Ш.Небиев ушуйиан 2013-пи йисан Гонконгдиъ кIули гъябгъру варидюн,яйин чемпионатдиз гьязур шула. Ихь миллетдин лайикьлу вакилиз думу талитариъра гъалиб хьувал ккун апIурхьа. 
Категория: "Табасарандин нурар" | Добавил: Admin
Просмотров: 716 | Загрузок: 0 | Рейтинг: 0.0/0
Всего комментариев: 0
avatar