| Главная » Файлы » "Табасарандин нурар" | [ Добавить материал ] |
Конкурсдиъ гъалиб гъахьир
| 29.08.2011, 14:12 | |
| Ихь миллетдин жигьил вакилари Урусатдин жюрбежюр йишвариъ
урхбаъра, ляхниъра заан хъуркьувалар гъазанмиш апIурайиваликан
аьхиримжи вахтна кми-кмиди хабрар ерхьури шулхьуз. Гьелбетда, му
гьякьикьатди ухьу гизаф разира апIура. Гъи узуз ихь гьацдар
ватанагьлийирикан сар вуйи Хазбулат Сялигьовдин хъуркьуваларикан ктибтуз
ккундузуз. Дугъу, чан абйир-бабарихъди яшамиш шули, Санкт-Петербург
шагьрин Невский райондин 332-пи нумрайин кьялан мектебдиъ 9-пи класс
ккудубкIну. Гележегдиъра Хазбулатди урхуб гьадму мектебдиъ давам апIиди.
2011-пи йисан апрель вазли, космонавтикайин йигъаз тялукь вуди, Санкт-Петербург шагьриъ Урусатдин уьмуми кьялан мектебариъ урхурайи баяр-шубарин арайиъ «Интеллектуальное возрождение» кIуру Вариурусатдин 20-пи конкурс шубуб номинацияйиъ («физикайин», «биологияйин», «филологияйин») кIули гъубшну. Душваъ уьмуми гьисабниинди 150-тIан артухъ баяр-шубар иштирак гъахьнийи, хъа «Филология» номинацияйиъ - 58 иштиракчи айи. Думу 58 иштиракчйирин арайиъ ихь ватанагьли Х.Сялигьовра ади гъахьну. Конкурсдин вари паяр ккудукIиган, жюрийи натижйир гъивнийи. Душваъ «Филология» номинацияйиъ 7 иштиракчийиз сабпи йишвар тяйин гъапIнийи. Гьадму гьисабнаъ ихь ватанагьли Х.Сялигьовра айи. Ургрид гъалибчйиризра 1-пи дережайин Дипломар ва кьиматлу пешкешар тувнийи. Гьаци, ихь ватанагьли 1-пи дережайин Дипломдин сагьиб гъахьну. Х.Сялигьовди къайд гъапIганси, му конкурс Урусатдин илмарин Академияйин Санкт-Петербургдиъ айи илимдин центри, Вариурусатдин «Союз» кIуру аэрокосмический обществойи, Санкт-Петербургдин аьлимарин Союзди тешкил гъапIуб вуйи. - Конкурсдиз узу «Табасаран халкьдин эпосдиъ аьршдин модель» темайиан доклад гьязур гъапIнийза. Йиз ахтармишар узу табасаран чIалниинди гъурху китабарин бинайиин алди гъухдар вуйи. Доклад гьязур апIбаъ йиз руководитель вуйи Екатерина Валентиновна Куприяновайи аьхю кюмек гъапIунзуз. Йиз терефнаан дугъаз аьхю чухсагъул мялум апIураза», - гъапнийи Х.Сялигьовди ич гюрюшдиъ. - Санкт-Петербургдиъ 2003-пи йислан мина яшамиш шулача, - гъапнийи ич сюгьбатнаъ Хазбулатдин дада Наидайи, - узу мялимди лихураза, хъа йиз жилир Физули предпринимателвалин ляхниин машгъул ву. Дугъу Санкт-Петербургдиъ тикилишчивалин фирма тешкил дапIна. Учу Табасаран райондин ТинитI гъулан агьалйир вуча. Швнуд-сад йисан Дербент шагьриъра яшамиш гъахьунча. Гьамусяаьтна ватандиз хяларди дуфнача. Къайд дапIну ккундуки, Хазбулатди, ужудар кьиматариз урхбахъди ва заан аьгъювалар гъадагъбахъди сабси, мектебдин жямяаьтлугъ уьмриъра жанлуди иштираквал апIура. ДумутIанна гъайри, думу спортдин швнуб-саб жюрейиан (самбойиан, дзюдойиан, пчIу атлетикайиан) спортдин секцйириз гъягъюра ва, мектебдиъ урхурайидарин арайиъ гъягъру талитариъ иштирак шули, пешкешнан йишвар гъазанмиш апIура. Дугъаз айи медалари ва грамотйири му балин хъуркьуваларикан шагьидвал апIура. Ихь жигьил ватанагьлийиз мюгькам сагъвал, урхбаъ ва спортдиъ хъана заан хъуркьувалар хьуб ккун апIурхьа. | |
| Просмотров: 1030 | Загрузок: 0 | Комментарии: 3 | | |
| Всего комментариев: 3 | |
|
| |
0
