Главная » Файлы » "Табасарандин нурар" [ Добавить материал ]

Хизандин гьякал, девлет...
24.02.2011, 11:48
Феруза Аьлиева,
ич хусуси мухбир, Хив район

«Халачйирин фабрикйирин ляхин жанлу апIбиин учу кьадарсуз рази вуча» - кIура «Мажвгларин халачйирин фабрика» ГУП-дин халачачи Зинаят Исмяиловнайи.
Халачачивал – ухьуз ихь ата-бабйирилан мина гъубзнайи аьдати кесп ву. Халачачивали табасаран халкьдин уьмриъ лайикьлу йишв бисура. Фицики диди райондиъ агьалйир ляхнихъди тямин апIру мумкинвал тувра. Хъа му месэла гъийин девриъ варитIан асасуб ву.
Халачачивал ихь халкьдин кьимат адру ирс, дурарин девлетлу культурайин сурат ву. Гьяйифки, аьхиримжи йисари хили гъубху халачйириз игьтияж гъудубгну, дурариз улихьна вахтари айи ад ис абхъуз хъюбгъну. Натижайиъ дюн’яйиз машгьур халачйир урхурайи фабрикйир ккадахьну. Анжагъ табасаран дишагьлийи чан юкIв али кесп дипундар.
Хайлин йисар улдучIвбан кьяляхъ, зегьметниин юкIв аливали, дугъхьан читинвалариан удучIвру рякъяр агуз гъахьну. Гьамусяаьтна Хив райондиъ Мажвгларин халачйирин фабрикайиъ ляхин гъизгъинди гъябгъюра. Душваъ 86 дишагьлийи зегьмет зигура. Гьаму макьалайиъ узуз гъи чав зигурайи баркаллу зегьметниинди гьюрматназ лайикьлу вуйи халачачи Зинаят Тагъиевайикан улхуз ккундузуз. Зинаят Тагъиева 1967-пи йисан декабрь вазли Хив райондин Мажвгул гъулаъ нежбрин хизандиъ бабкан гъахьну. БицIиди амиди зегьметниин юкIв алди тербияламиш гъапIу Зинаят саб вахтнара ляхнихьан ярхла гъахьундар. Багъри гъулан мектеб ккудубкIган, думу Мягьячгъалайин бухгалтервалин мектебдиз урхуз гъягъюру. Думу ккудубкIу жигьил шуру чан зегьметнан рякъ «Межгюльский» СПК-йин бухгалтервалилан ккебгъру. Кьяляхъна йисари «Мажвгларин халачйирин фабрика» ГУП-диъ жавабдар гъуллугънаъ лихуру.
Гьякьлуди кIуруш, инсандин уьмур бахтлу хьпан бадали, тербияйин дарсарихъди сабси дугъаз уьмрин ужур юлдашра кьисмат духьну ккунду. «Инсандин варитIан аьхю бахт хизандиъ а», - кIури шулу аьхюдари. Му гафар гьякьлударра ву. Жигьил шуру му гафар фикирназ гъадагъну, думу йисари ужуб албагу хизанра ккебгъну. Дугъу чан уьмрин юлдашдихъди юкьур велед аьхю ва тербияламиш апIура.
Зинаят 1995-пи йислан мина Мажвгларин халачйирин фабрикайиъ халачи убхбиин машгъул ву.
- Халачи убхувал бицIи вахтнахъан мина юкIв али пише вуйиз. КIваин алмийиз, узуз сифте гугар алахьуз, халачи убхуз ич дадайин юлдаш, ич гъунши Зейнабат бажийи улупнийзуз. Думуган узуз халачи убхувал читиндиси гьибгъуйзуз, хъа гъи халачачивал йиз уьмрин метлебси рябкъюразуз. Фабрикайин ляхнихьан азад йигъар гъахьиган, йиз шубарихъди сатIиди убхури, хулаъра аьхю халачи дирибшназа. Гьелбетда, улихьдиси дарди гъийин деврин жигьиларин му ляхнихъ юкIв хъадар. Саб раж алабцIайиз, дурар кьюб-шубуб ражари гъудужвури шулу. Хъа ухьу варидари, наслариз му кесп улупну, ихь халкьдин ирс уьбхюз зегьмет дизигну ккунду. Хъа асас вуди фабрикйирин ляхин жанлу апIбиин учу кьадарсуз рази вуча. Фицики думу учуз ляхнин йишвар ву. ИкибаштIан, хизандин бюджетдиз кюмекра ву, - давам гъапIну дугъу.
- Учвуз ичв ляхниъ фицдар читинвалар алахьурачвуз?
- Ляхин апIуз учуз ич директори вари шараитар яратмиш апIура. Мурсларихъдира тяминди вуча. Маважибарра вахтниинди туврачуз. Анжагъ ич зегьметназ гъилигу кьимат туврадар. Маважибарин кьадар за гъапIнийиш, халачачйирин кьадарра артухъ хьибдийи.

Категория: "Табасарандин нурар" | Добавил: Admin
Просмотров: 729 | Загрузок: 0 | Рейтинг: 0.0/0
Всего комментариев: 0
avatar