| Главная » Файлы » "Табасарандин нурар" | [ Добавить материал ] |
Хиварин ва Йошкар-Олайин дамагъ
| 26.01.2013, 23:03 | |
автор:Алиева Феруза  Аьхиримжи йицIуд йисандин муддатнаъ
ихь уьлкейиъ спорт артмиш апIбаз ижмишнаан фикир тувра. Гьадму
гьисабнаан спортдин мектебар, дараматар тикмиш апIбаз федералин ва
регионарин ерли бюджетариан гьяйиф дарди пул жара апIура. Аьхю шулайи
наслар сагъламвалин, ватанпервервалин лишнариккди тербияламиш апIбан
бадали, му жигьатнаан Хив райондиъра хайлин зегьмет зигура. Гьелбетда,
жавабдарвалиинди янашмиш гъахьи фунуб ляхнира заан натижйирра арайиз
хуру. Хив райондин ДЮСШ-йиъ агъювалар гъадагъу жигьилари йигълан-йигъаз
заан хъуркьувалар гъазанмиш апIура. Гъи спортдин яркьу майдандиз
удучIвнайи спортсменарин арайиъ ихь ватанагьли Рафик Гьясанялиевди асас
йишв бисура.
Рафик Гьясанялиевдин абйир-бабар Хив райондин Арчугъ гъул,ан ву. Дугъан адаш Замир Мажидовичди райцентриъ ляхин апIурайивал себеб вуди, дурар Хивна удучIвну гъюру. 1993-2004-пи йисари Хиварин кьялан мектебдиъ асас аьгъювалар гъадагъбахъди сабси, Рафик спортдин жюрбежюр жюрйириинра машгъул шулу. Дурумлувалиинди зегьмет зигуз ккунивализ лигну, 2003-пи йисан Рафик Гьясанялиев дзюдойиан Дагъустандин чемпион гъахьну. Спортсмендиз сифтейин аьгъювалар тувур, Рафикдиз спортдин аьламдиз рякъ ачухъ гъапIур дугъан тренер, дзюдойиан варихалкьарин дережайин мастер Тельман Гъурбанов ву. 2004-пи йисан Р.Гьясанялиев Санкт-Петербург шагьриъ физический культурайинна дявдин институтдик урхуз кучIвру. 2009-пи йисан лейтенантдин звание ади институт ккудубкIу жигьил пишекар Марий-Эл республикайин Йошкар-Ола шагьриъ ерлешмиш дубхьнайи дявдин частназ гъуллугъ апIуз гьаъру. Рафик Гьясанялиевди думу частнан физкультура жигьатнаан гьязурлугвалар гъахру полкнан начальникдин гъуллугъналан чан зегьметнан рякъ ккебгъру. Рафик Гьясанялиевди, Марий-Элин машгьур тренерар Сергей Кусакиндин, Александр Ариткуловдин, Максим Мосумовдин, Владимир Кардашовдин регьберваликкди аьгъювалар гъадагъну, 2010-пи йисан дзюдойиан, самбойиан ва хиларихъди кичIихбаан Урусатдин талитариъ чемпионвалин йишвар гъазанмиш апIуру. 2011-пи йисан июнь вазли Украинайин Южный шагьриъ панкратиондиан кIули гъубху Европайин III-пи чемпионатдиъ Рафикди, юкьуб гужли женг духну, дурариъ варидариъ машгьур спортсменариин умудлуди гъалибвал гъадабгъуру. Душваъ 16 уьлкейин вакилари иштираквал гъапIнийи. Му талитариъ ихь ватанагьли 110 кг. гъагъ айи спортсменарин арайиъ Европайин чемпион гъахьну. Гьадму йисан сентябрин аьхириъ Сербияйин Белград шагьриъ панкратиондиан кIули гъубшу дюн,яйин чемпионатдиъ дугъу пешкешнан йишв гъазанмиш апIуру. Гьадму йисари, Урусатдин варитIан кьувватлу спортсменарин иштираквал ади гъягъюрайи жюрбежюр турнирариъ иштирак духьну, Рафик Гьясанялиевди дзюдойиан, самбойиан, панкратиондиан «Урусатдин спортдин мастер» ччвур гъазанмиш апIуру. Рафик панкратиондиан Урусатдин варитIан ужударстар 10 спортсмендин сиягьнан дахилнаъ а. Къайд апIуб лазим вуки, дурар вари халкьарин арайиъ гъушу талитариъ улупу удукьуваларин натижайиъ гъядягъдар ву. Гьадму гьисабнаанра анжагъ FILA-йин лишниккди гъазанмиш дапIнайи хъуркьувалартIан гьисабназ гъадагъурадайи. Душваъ Рафик, 64 балл гъадагъну, сабпи йишв,ина удучIвну. Гьамусяаьтна ихь бажаранлу спортсмен, Марий-Эл республикайин терефнаан жюрбежюр талитариъ иштирак шули, Йошкар-Ола шагьриъ чан хизандихъди яшамиш шула. Амма дугъу гьар вахтна чан багъри райондихъди, чан сарпи тренерарихъди аьлакьйир уьрхюра. - ИкибаштIан, гъалибвал думукьан рягьятди гъадабгъуз шлуб дар, - кIура ич гюрюшдиъ Рафик Гьясанялиевди. – Спортдин женгар гъагъидар, талитариъ алахьру спортсменар заан дережайиъди гьязур духьнайидар шулу. Жвуван удукьувалар гьарган гюзчиваликк дюрхну ккунду. Узу азад вахтнан асас пайра спортзалиъ адапIури шулза. Хъа му хъуркьувалар гъазанмиш апIбаъ йиз уьмрин юлдшин, абйир-бабарин кюмек аьхюб ву, фицики дурар гьарган йиз гъавриъ ва гъуллугънаъ а. Аьхиримжи вахтари бязи кюмек Хив райондин администрацияйин терефнаанра тувра. Чухсагъул варидариз. Дурари уз,ина дубхнайи ихтибарвал ликрин кIанакк ккидривруси зегьмет зигидиза, - аьлава гъапIну спортсменди. Рафик Гьясанялиевдиз спортдин аьламдиъ хъана заан кIакIариз удучIвуз мюгькам сагъвал, хизандиъ хушбахтвал, дугъан гъалибвалар ислягьвалиндар хьувал ккун апIурхьа. | |
| Просмотров: 1034 | Загрузок: 0 | | |
| Всего комментариев: 0 | |