Главная » Файлы » "Табасарандин нурар" [ Добавить материал ]

Ишигънахьна жилгъйир
29.11.2010, 23:24



Гьаму учвуз рякъюрайир Табасаран райондин Цухдигъ гъулан кьялан мектебдин ккергъбан классарин мялим Нефтуллагь Асланов ву. Жигьилариз аьгъювалар ва тербия тувбан чюлиъ му касди 50 йисан зегьмет гъизигну ва гъира гьадму баркаллу ляхин тамам апIура. 

Жигьилариз аьгъювалар ва тербия туври, думу чаз айи аьгъювалар ва пишекарвалин дережа сикин дарди за апIбиинра машгъул гъахьну. 1965-пи йисан Хасавюрт шагьриъ ерлешмиш дубхьнайи педучилище, 1977-пи йисан Дагъустандин педагогвалин институтдин филологияйин факультет ккудубкIну. Му институт ккудубкIу Нефтуллагь Асланович гьадму йисан багъри райондин ФуркIил гъулан бегьем дару кьялан мектебдин директорди тяйин апIуру. Душваъ 11 йисан гъуизигу зегьметнан натижайиъ, дугъу мектебдин материалинна техникайин тяминвал, баяр-шубариз аьгъювалар ва тербия тувбан ляхин заан дережайиз адаъну. Мектебдин коллективдиъ ва абйир-бабарин, жямяаьтлугъдин арайиъ аьхю гьюрмат гъазанмиш гъапIну. Мугъан мектебдиъ урхурайи баяр-шубари, райондин УО-йи тешкил апIру олимпиадйириъ жанлуди иштирак шули, гизаф предметариан пешкешнан йишвар гъазанмиш апIури гъахьну. Нефтуллагь Аслановичдин регьберваликкди душваъ мялимарин ужуб, албагу коллектив дюзмиш гъабхьну.


1988-пи йисланмина Нефтуллагь мялим чан багъри Цухдигъ гъулан кьялан мектебдиъ ккергъбан классарин мялимди лихура. Марцци кIваан, аьшкь ади тамам гъапIу ляхнин натижйирра ужудар шули аьдат ву. Гъи дугъан ученикар жюрбежюр йишвариъ мялимарди, духтрарди, райондин администрацияйин гъуллугъчйирди лихура. ДумутIанна гъайри, Нефтуллагь Аслановичди дарсар киву баяр-шубар, Табасаран райондиъси, уьлкейин жюрбежюр регионариъ, шагьрариъ гьюрмат ади ва чпин пишекарвалин вазифйир хъуркьувалиинди тамам апIури яшамиш шула.

Цухдигъ гъулан кьялан мектебдин директор Салман Фейзиевди Нефтуллагь Аслановичдин гьякьнаан гьамци кIура: «Нефтуллагь Асланович ич мектебдиъ варитIан аьхю тажруба ва варитIан аьхю гьюрмат айи мялимарикан сар ву. Думу чан гьарсаб дарснахьна жавабдарвалиинди янашмиш шула, гьарган ляхнин тажрубайиъ цIийи къайдйир агбиин машгъул ву. Гьаддиз мугъу ляхниъ хъуркьуваларра гъазанмиш апIура. Гьарсар бицIирихьна хусуси къайда, гьарсарин кIвахьна рякъ абгувализ, гьарсар бицIирин удукьувалар артухъ апIуз шлувализ лигну, баяр-шубарин ва абйир-бабарин терефнаан дугъаз аьхю гьюрмат а. Улихьна йигъари Хючна гъулан культурайин хулаъ шиърар урхбан конкурс тешкил гъапIнийи. Думу конкурсдиъ Н.А.Аслановдин ученик Нариман Аслановди (2-пи класс) шиърар ужуди урхбаан 1-пи йишв гъибисну.

Нефтуллагь Аслановичди дарс киву ва тербия туву урхурайидар заан аьгъювалар айидар шулу. Чав зигурайи марцци зегьметназ ва хъуркьувалариз лигну, му ужур мялимдиз,тербиячийиз, жямяаьтлугъ касдиз мектебдин администрацияйин, райондин УО-йин ва «Табасаран район» МР-йин главайин терефнаан швнуб-саб ражну Гьюрматнан грамотйир, кьиматлу пешкешар тувну. Государствойин терефнаанра дугъан хъуркьувалар лишанлу дарапIди амдар. Думу «Республикайин халкьдин образованиейин отличник» медалихъди, «РФ-йин уьмуми кьялан образованиейин мектебарин гьюрматлу гъуллугъчи» ччвурнахъди ва «Зегьметнан ветеран» удостоверениейихъди лишанлу дапIна».

Нефтуллагь Асланович ужур мялимси, тербиячиси аьхю ва албагу хизандин кIулра ву. Дугъу чан уьмрин юлдаш Сефиятдихъди 7 велед аьхю ва тербияламиш гъапIну. Дурариз образование тувну, хизанар ккергъну. Дугъан аьхюнур риш Мафият, Украинайин Измаил шагьриъ педагогвалин университет ккудубкIну, гьамус, Санкт-Петербург шагьриъ лихури, чан хизандихъди яшамиш шула. Бай Нариманра чан хизандихъди душваъ яшамиш шула. Низамийи Чечендиъ контрактдиинди гъуллугъ апIура. Шубар Магьизат, Маркизат, бай Нуруллагь Дербент шагьриъ чпин хизанарихъди яшамиш шула. БицIинур бай Фарман, Санкт-Петербургдиъ юридический академия ккудубкIну, Табасаран райондиъ судебный приставди лихура. Гьамус яшлуйирин багахь чпин худул Артем хьа. Дугъу Цухдигъарин кьялан мектебдин 8-пи классдиъ урхура.

Аргъаж шулайи наслиз дерин аьгъювалар ва ужуб тербия тувбаъ фидакар зегьмет зигурайи Нефтуллагь Аслановичдиз мюгькам сагъвал, ярхи уьмур, хизандиъ хушбахтвал, гележегдиъра чан баркаллу ляхниъ хъана заан хъуркьувалар хьуб ккун апIурхьа. Гъит му касдин вари ужудар ниятар, кьастар тамам ишри, мицисдар мялимар ва тербиячйир ухьухь артухъ ишри.



- Нефтуллагьдин 6 ваз гъабхьиган, йиз жилир дявдин вахтна кечмиш гъахьнийи, – кIваин апIура мугъан дадайи, -бализ тебрия тувур ва аьхю гъапIур узу вуза. Багъри гъулаъ 7-пи класс ккудубкIган, узу думу Хючнаарин кьялан мектебдиз гьаънийза. 1960-пи йисан, 10-пи класс ккудубкIубси, Нефтуллагь багъри гъулаъ ккергъбан классарин мялимди дерккнийи. Гьадму йисламина гъийин йигъазкьан дугъу мялимвалин кесп тамам апIура.

Категория: "Табасарандин нурар" | Добавил: Admin
Просмотров: 722 | Загрузок: 0 | Рейтинг: 0.0/0
Всего комментариев: 0
avatar