| Главная » Файлы » "Табасарандин нурар" | [ Добавить материал ] |
ГвачIнинган кичIибгу уьмур
| 04.02.2011, 11:11 | |
| авторы:Гьяжимягьямед Гьяжиев Йиз гьаму макьалайин игит гизаф кьадар ихь ватанагьлийириз, асас вуди Табасаран райондин агьалйириз, танишди ву. Гьаз гъапиш аьхиримжи 14 йисан, яни 1996-пи йисланмина, Ольга Николаевна Красножёнова Табасаран райондин УО-йиъ методистди лихура. Шаксузди, думу райондин мялимарин арайиъ адлу пишекрарикан сарси гьисаб апIура. О.Н.Красножёнова 1954-пи йисан Хючна гъулаъ аьлакьайин гъуллугъчйирин хизандиъ бабкан гъахьну. Аьхю наслин вакилар вуйи Николай ва Нина Красножёноварин хизан гизаф табасаранлуйириз ужуйи аьгъяшул. Дурар чпин ляхниз вафалувалиинди, чпиз кьюбпи ватан гъабхьи Табасарандиз аьхиризкьан дугъриди гъузувалиинди адлу гъахьи ксар вуйи. Ольгайин адаш Николай Красножёнов Ватандин Аьхю дявдин иштиракчира вуйи. Гьациб хизандиъ бабкан, аьхю ва тербияламиш гъахьи шуру Хючнаарин кьялан мектеб тафавутлувалиинди ккудубкIбалан кьяляхъ, чан гележегдин уьмрин рякъ аргъаж шулайи наслихъди ляхин апIбахъди аьлакьалу пишейиз бахш апIуз кьаст гъапIнийи. 1971-пи йисан думу ДГПИ-йик урхуз кучIвнийи ва 1977-пи йисан уьру дипломдиинди думу ккудубкIнийи. Жигьил пишекриз чан зегьметнан рякъ ВЛКСМ-дин Табасаран райкомдин 2-пи секретарди лихуз хъюгъбалан ккебгъуб кьисмат гъабхьнийи. Институтдиъра жямяаьтлугъ ляхнариин машгъул хьували, жикъи вахтнан арайиъ жигьиларихъди вуйи жавабдар ляхниъ умудлуди гамар алдагъуз удукьувализ аьхю кюмек гъабхьнийи. УрчIвуд йисан дугъу думу ляхин намуслуди тамам гъапIнийи. Совет деврин вахтари КПСС-дин тешкилатчивалин гъуллугъар тамам апIувал варитIан адлу ва жавабдар ляхинси гьисаб апIуйи. Аьдат вуйиганси, дицисдар ляхнариз партияйиз ва халкьдиз вафалу, политикайин заан савадлувал айи ва бажаранлу ксариз дих апIуйи. Гьаци, 1985-пи йисан Ольга Красножёновайиз дициб ляхинра ихтибар гъапIнийи – думу КПСС-дин Табасаран райкомдин инструкторди дерккнийи. Думу гъуллугъниин Ольга Николаевна 1991-пи йисазкьан, яни КПСС дабгъайизкьан, гъилихнийи. Хъа дидхъанмина, 1996-пи йисазкьан, дугъу яшнакк ккуркьну адрударин ляхнариз лигру комиссияйин жавабдар секретарвалин вазифйир тамам апIури гъахьну. Ольга Красножёновайи ккадапIу фидакарвалин зегьметнан рякъ тялукь пешкешариинди ва багъишариинди лишанлу дапIна. Дугъаз «РФ-йин уьмуми кьялан образованиейин гьюрматлу гъуллугъчи» лайикьлу ччвур, ВЛКСМ-дин ЦК-йин, обкомдин, райкомдин Гьюрматнан грамотйир, медалар, райондин администрацияйин главайин терефнаан кьиматлу пешкешар а. - Узуз ужудар дустар, багахьлу инсанар, гьюрматлу гъуншйир, гъуландар азуз. Дурарихъди сигъ аьлакьа ади яшамиш хьувал йиз уьмрин асас мяна вуйиб гьисаб апIураза, - кIура Ольга Николаевнайи. О.Н.Красножёновайиз уьмриъ хайлин дердер, хажалатар аьгь апIувалра алабхъну. 2001-пи йисан Санкт-Петербург шагьриъ дугъаз айи-адру сар велед вахтсузди уьмриан гъушну. Хъа аьхиримжи вахтна хатIайиан дугъан лик гъюбгъну. Гизаф вахтна дугъаз ахниъ дахъувал алабхъну. Читин вахтна дугъу, асас вуди, багахьлуйирин, дустарин, гъуншйирин терефнаан аьхю кюмек гьисс гъапIну. Думу гьиссну чан нубатнаъ Ольга Николаевнайиз цIийикIултIан ликриин хьуз, уьмрик миж кивуз кьувват тувну. Учв урус хизандиъ бабкан гъахьнушра, Ольгайи, мусурман дин кьабул дапIну, дидин тIалабар хъайи-хъайибси тамам апIура. «Ислам диндин рякъюъ учIвували йиз уьмур ужуб терефназ илтIибкIну», - гъапнийи дугъу ич сюгьбатнаъ. Дугъриданна, уьмриъ алахьу читинвалар аьгь апIбаъ дугъаз ислам диндин роль заанубди рябкъюра. Гьаму макьалайин аьхириъ узу, Ольга Николаевна ЦIийи йисахъди мубарак апIури, дугъаз чан улихь хьимбу уьмур ужудар йигъар-йишварикан ибарат вуйиб хьуб, дидиъ хушбахтвалин геренари асас йишв бисуб ккун апIураза. | |
| Просмотров: 1096 | Загрузок: 0 | | |
| Всего комментариев: 0 | |