Гьаму улихьнаси Ростовский областдин Гуково шагьриъ 18 йисахьна яш дубхьнайи жигьил спортсменарин арайиъ дзюдойиан Варихалкьарин турнир гъабхьну. Урусатдин дзюдоистарин талитнан командайик Дербент шагьрин 5-пи ДЮСШ-йин, ихь ватанагьли Асланбегов Насуруллагьди регьбервал туврайи, кьюр спортсменра кахъну. Гьаму талитариъ Европайин гизаф уьлкйирин машгьур дзюдоистар иштирак гъахьнийи. Талитар гъахуб Московский Олимпиадайин дзюдойиан чемпион, спортдин лайикьлу мастер Владимир Невзоровдин приздиз бахш дапIнайи. Урусатдин сборный командайиъди дзюдойиан спортдин мастервализ кандидатар Аьбдулла Расулов ва Мурад Амирметов гъалиб гъахьну. Аьбдулла Расуловди, 100 килограмм гъагъ айидарихъди талитназ удучIвну, гъизилин медаль гъазанмиш гъапIну. Мурад Амирметовди 81 килограмм гъагъ айидарин арайиъ кемшрин медаль гъадабгъну.

Урусатдин дзюдоистарин арайиъ гъалиб гъаши гьаму медалистариз, аьхю яшнан командайин дахилнаъди, Урусатдин сборный командайин дахилнаъди, ноябрь вазли Адлер шагьриъ гъягъру дзюдоистарин талитариз теклиф дапIна.

Аьбдулла Расулов «Юждаг» институтдиъ ужуйи урхурайидарикан сар ву. Хъа Мурад Амирметов Ивановский государственный университетдин Дербентдин филиалин сабпи курснаъ урхура. Дурарин тренерар РД-йин спортдин ва физкультурайин лайикьлу гъуллугъчйир, гизаф йисарин тажруба айи Мубариз Амирметов ва Жамал Жалалдинов ву.