Главная » Файлы » "Табасарандин нурар" [ Добавить материал ]

Дагъустанди кьувват тувразуз
31.07.2012, 21:42

авторы:Зубайдат Шябанова 

  Гьаму йигъари Мягьячгъала шагьриъ «Динамо» стадиондин конферец-залиъ Дагъустандин вари дюн,яйиз машгьур боксер-профессионал Мягьямед Аьбдусаламов журналистарихъди гюрюшмиш гъахьну. Дупну ккундуки, гьаму йисан июлин 6-пи йигъан Мягьямед Аьбдусаламовди Америкайин Лас-Вегас шагьриъ пишекарвалин боксдин рингдиин 15-пи ражари гъалибвал гъадабгъну. Нубатнан ражари рингдиз думу Америкайин варидюн,яйин машгьур боксер Морис Байармдихъди удучIвну. Журналистарихъди гъубху пресс-конференцияра ихь боксерин ва америкайин спортсмендин арайиъ гъабхьи боксдихъди аьлакьалу гъапIнийи.
  Морис Байармдихъди вуйи боксдин талитарин кьюбпи раунддиъ технический накаутдиинди ихь боксер гъалиб гъахьнийи.
  «Ич арайиъ гъябгъюрайи бокс гьамци ухди ккудубкIуру кIури фикир дайиз. Гьаз гъапиш учу кьюб вазлин арайиъ думу боксерин кичIихбариз, дугъан техникайиз, удукьувалариз, мумкинвалариз фикир туври гъахьунча. Думу саб ражарикьан я накаутдиъ, я накдаундиъ гъахьир дар. Гьаму себебариан, ич кичIихубра 5-6 раунддиз ярхи шулу кIури фикир апIурайча. Морис гизаф хъял кади кичIихрур, ужуйи гьязур духьнайир ву. Кьюб вазтIан артухъ улихьна дугъу узуз чахъди кичIихуз дих гъапIнийи. Учу, йикьрарин кагъзар ацIну, боксдиз гьязур хьуз хъюгъюнча. Бокс ккебгъайиз улихьна узуз дугъкан, дугъаз узкан вари мялуматар айчуз. Байармдиз уз,ин чан техникайиинди гъалибвал гъадабгъуз ккунди гъахьну. Хъа узу дугъаз къаршуди дийигъузра, гъалиб хьузра гьязур духьнайза», - ктибтура Мягьямед Аьбдусаламовди. 
  Боксдин нубатнан кичIихбар Аьбдусаламовди гьаму йисан октябрь вазли гъахуз планламиш апIура. Дугъан гафариинди, думу бокс Америкайиъ гъябгъиди ва машгьур NBC теле-каналиан улупиди.
«Аьхю гъагъ айи боксерарин кичIихбарикан продюсерари варидариз маракьлу шоу гьязур апIуру. Чпин боксдин яркьу программайиъ иштирак хьуз дурари сабпи нубатнаъ узуз теклиф дивнийи. Хъа узуз, боксдихьан саб вазли ярхла духьну, рягьятвал гъадабгъуз ккундийзуз. Мидлан гъайри, ич командайиз Кличко гъардшарихьан гьаму йисан 8-пи сентябриъ Москвайиъ гъябгъру боксдин талитариъ иштирак хьуз теклиф диврайи кагъаз гъафну. Багахь йигъари думу теклифназ жаваб тувурча. Йиз фикриан, жаваб разивал туврайиб хьибди. Дупну ккундуки, думу талитариз 35 агъзуртIан артухъ тамашачйир уч шулу. Дурарин арайиъ Урусатдин Президентра хьиди. ИкибаштIан, узуз ихь республикайихъан душваъ иштирак хьуз ва гъалибвал гъазанмиш апIуз ккундузуз. Думу кичIихбариъ учуз шубур аькси кандидатура улупну. Дурарикан учу сар гъядягъну ккунду», - къайд гъапIну Мягьямедди.
  Мягьямед Аьбдусаламовдин гафариинди, багарихьди дугъу Канадайин машгьур боксерихъди рингдиз удучIвуз планар йитIурайи. Жюрбежюр себебариан думу рингар жара вахтназ гъитну. «Эгер гьадму рингдиъ гъалиб гъахьиш, нубатнан кичIихбар Кличкойин сарнур гъардшихъди гъахидийза. Йиз фикриан, бицIи вахтарилан ухьу кIваъ айи кьастарихъ ва мурадарихъ хъуркьдихьа», - кIура М.Аьбдусаламовди.
  - Мягьямед, яв кичIихбарикан саб Дагъустандиъ гъабхуз мумкинвал айин?
  - Ихь республикайиъ йиз кичIихбар гъахьнийиш, узу лапра рази хьидийза. Хъа думу узкан асиллу вуйиб дар.
  - Аэропортдиз уву къаршуламиш апIуз Мягьячгъала шагьрин мэр Сяид Амиров гъафнийи. Дагъустандиъ яв талитар гъахбаъ дугъхьан кюмек апIуз хьибдарин?
  - Удудукьру, вая кIулиз адабгъуз даршлу ляхин шлуб дар. Сяид Жяфаровичди узуз гьаммишан кюмек апIуру. Дугъаз аьхю чугъсагъул мялум апIуз ккундузуз. Эгер, сацIиб гуж гъапIиш, думу месэла гьял апIуз шулу, - кIури фикир вуйиз.
  - Яв цIийи тренер Дени Гарсийикан фу пуз шулвухьан?
  - Гарси хьайиз улихьна вуйи тренери узуз чан техникайиинди кичIихуз гуж апIури гъахьну. Думу техника узуз хас вуйиб дайи. Гьадму техникайиинди узхьан кичIихуз шули гъабхьундарзухьан. Гьаддиз, арайиъ мясляаьт дапIну, жара гъахьунча. Гъийин тренери, йиз техникайиз, йиз аьгъювалариз ва мумкинвалариз дилигну, узухъди ляхин апIуз, йиз тактика артмиш апIузра. Узу дугъ,ин рази вуза.
  - Аьхиримжи яв кьюб кичIихбариз «Анжи» командайин футболка алди удучIвнийва? Увура «Анжийин» терефкар вува?
  - Ав, узу ихь футболин командайихъан лап юкIв убгураза. Ухьу вари «Анжийин» хъуркьувалариз ккилигурахьа. Сабпи кичIихбариз Роберто Карлосдин, хъа кьюбпи кичIихбариз Это’О-йин ччвурар кайи футболкйир алахьнийза.
  - Увуз хал-хизан авуз?
  - Ав, узу йиз хпирихъди ва ич кьюр шурахъди Америкайин Лос-Анджелес шагьриъ яшамиш шулаза. Аьхюнур риш мектебдиз гъягъюра. Бабкан узу Акъуша райондиъ гъахьунза.
  - Уву гъуху 15 кичIихуб боксдин сабпи раунддиъ хъуркьувалиинди ккудукIунва. Багарихьди увуз дивнайи важиблу теклифарин боксдин кичIихбариз гьязур духьнава?
  - Узу кичIихбарихьна гьязур вуйи боксер вуза. Жвувахъди боксдиз удучIвурайи къаршу спортсмендихьна гьязур хьуз кьюб ваз лазим ву. Думу вахтнан арайиъ, дугъан тактикайиз, техникайиз аьксиди дийигъуз дубгъури, дугъ,ин гъалиб шлу мумкинвалариинди ва тактикайиинди тренировкйир духну ккунду. Мисалназ, чемпионвалин талитарихьна гьязур хьуз вари мумкинвалар азуз. Йиз кьувват Дагъустандикан вуйи мани гьиссари хъана мюгькам апIура.
Категория: "Табасарандин нурар" | Добавил: Admin
Просмотров: 641 | Загрузок: 0 | Рейтинг: 0.0/0
Всего комментариев: 0
avatar