Главная » Файлы » "Табасарандин нурар" [ Добавить материал ]

Cпортдин кIакIназ адаура
28.03.2011, 13:48
авторы:Гъазимягьмад Шабалаев

Дербент райондин Рубас гъулаъ яшамиш шулайи ихь ватанагьли Сяидягьмед мектебдиъ урхури амиди спортдиин юкIв алир вуйи. Физкультурайин дарсариъ мялимдихъди, дугъан арчулну хилси, физкультурайин тешкиллувалин гьяракатар, дарс ва уйнамишар гъахуз кюмекар туври шуйи. Карачаево-Черкессияйин Автономный округдин Черкесск шагьриъ автодорожный техникумдиъ урхурайиган ва кьюд йисан Советарин Армияйиъ гъуллугъ апIурайиган, Сяидягьмед спортдихьна ва дидин жюрйирихьна багахьди янашмиш шулу. Армияйиан гъюбан кьяляхъ думу Дербент райондин Куллар гъулан ДЮСШ-йиъ юкьяр дисбан спортдин жюрейиан мялим-тренерди, хъа 1990-пи йисхъан мина Рубасдин СОШ-диъ мялимди лихура. Чан ляхниин юкIв алди лихурайи кас, аьгъюваларин дережа за апIбан бадали, ДГПУ-йин физкультурайин факультетдик заочноди урхуз кучIвру ва хъуркьувалиинди думу ккудубкIуру.
Сяидягьмед Мислимовди, физкультурайин мялимди лихури, чав ляхин удукьру, заан дережайин пишекар, дериндиан аьгъювалар айи ва урхбанна тербияйин ужур тешкилатчи вуйиб улупну. Дугъу мектебдиъ баяр-шубариз аьгъювалар ва тербия тувбан ляхин яркьу апIура. Гьарсаб физкультурайин дарснаъ дугъу теорияйин ва практикайин аьгъювалар тувра.
Сяидягьмеддин ляхин нумуна вуйиб асихъ хъайи улупбари шагьидвал апIура. Дугъу Рубасдин мектебдиъ урхурайи баярикан тешкил гъапIу футболин «Рубас» командайи райондин ва республикайин чемпионатариъ 2001, 2004, 2005, 2008-пи йисари гъалибвалар гъадагъну. Дагъустан Республикайин лайикьлу деятель С.Д.Къурбановдиз бахш вуди футболиан гъубху республикайин турнирариъ Сяидягьмедди регьбервал туврайи «Рубас» команда чемпион гъабхьну. 2000-пи йисан РД-йин сабпи йишв бадали гъубху футболин талитнаъ Дербент райондин «Виноградарь» командайи, Сяидягьмед Мислимовдин иштираквал ади, шубубпи йишв гъадабгъну. Думу «Рубас» футболин командайин капитан ва уйнамишарин тренер, юкьяр дисбан спортдин мастер ву. Дугъу тербия туву Нажмудин Хуршидов женгнан самбойиан дюн’яйин йицIиюкьур кIуру чемпион духьна. Гьямза Асланов ва Шамсулла Мислимов юкьяр дисбан спортдиан РФ-йин Яракьлу Кьувватарин чемпионар, Р.Аьбдуллаев ва В.Рамазанов женгнан самбойиан РД-йин чемпионар ву. Гьаму улихьна йигъари Рубасдин кьялан мектебдин 11-пи «б» классдиъ урхурайи А.Сяидовди ва С.Мислимовди юкьяр дисбан спортдиан райондин ва республикайин талитариъ чемпионвал гъадабгъну. 2010-пи йисан 26-пи декабри Самара шагьриъ гъабхьи «Шагьрин ачухъ чемпионат» кчIихбариъ 55 килограмм гъагъ айи спортсменарин арайиъ Зульфикьар Панаховди сабпи йишв гъадабгъну.
Физкультурайин мялим ва 10-пи «в» классдин руководитель Сяидягьмедди тербия тувбан ва физкультурайин серенжемар гъахбан ляхин, урхурайидар физкультурайихьна ва спортдихьна жалб апIруси, дурарин маракьарихъди гъюруси тешкил апIура. Дугъу урхурайидарин абйир-бабарихъди, гъулан жямяаьтлугъдихъди гьаммишан аьлакьа уьбхюра. Дугъан хъуркьувалар ва гизаф йисари зигурайи лайикьлу зегьмет Рубас гъулан мектебдин дирекцияйин, райондин образованиейин управлениейин, райондин администрацияйин терефнаан Гьюрматнан грамотйириинди, пешкешариинди лишанлу дапIна.
Сяидягьмед Мислимов РД-йин просвещениейин отличник ву. 2010-пи йисан 19-пи октябри дугъаз РД-йин лайикьлу мялим ччвур тувну.

Категория: "Табасарандин нурар" | Добавил: Admin
Просмотров: 695 | Загрузок: 0 | Рейтинг: 0.0/0
Всего комментариев: 0
avatar