| Главная » Файлы » "Табасарандин нурар" | [ Добавить материал ] |
Чирагъ библиотекайиъ кичIибгуру
| 21.02.2011, 11:17 | |
| авторы:Гьяжимягьямед Гьяжиев Гъийин деврин читинвалариз дилигди, чпи апIурайи ляхнихьна, пишекарвалин, гъуллугънан вазифйирихьна жавабдарвалиинди янашмиш шлу гъуллугъчйир ухьухь гизаф а. Дурариинди ухьу утканра вухьа. Гьадрарикан сар вуди Табасаран райондин библиотекйирин гъурулушдин методикайин отделин заведующий Багьарат Жамалутдиновна Ильясовара гьисаб апIуз шулу. 2010-пи йисан аьхириъ Мягьячгъала шагьрин Р.Гьямзатовдин ччвурнахъ хъайи республикайин милли библиотекайиъ «Библиотекарин шаирвалин гаф» конкурсдин натижйир гъивнийи. Думу конкурс, Дагъустан Республикайин милли библиотека тешкил гъапIхъан мина 110 йис тамам хьпахъди аьлакьалу вуди, Дагъустандин писателарин Союзди ва республикайин милли библиотекайин кIулиъ айидари 2010-пи йисан эвелариъ тешкил гъапIуб вуйи. Дагъустан Республикайин шагьрариан ва гъулариан му конкурсдиъ 18 библиотекарь иштирак гъахьнийи. Дурарин арайиъ ихь ватанагьли, Табасаран райондин ЦБС-дин методист Багьарат Ильясова айи. Конкурсдиз дугъу чан эсерар адагънийи: «Юлдаш» прогимназияйин гимн», «Ккуни уьлке» авторвалин мяъли. Багьаратдин эсерар конкурсдин иштиракчйириз ва жюрийиз гизаф кьабул гъахьнийи. Конкурсдин жюрийин председатель, Дагъустандин писателарин Союздин председателин заместитель Марина Аьгьмедовайи гьамци гъапнийи: «Б.Ильясовайин эсерар имбударихьан тафавутлудар ву. Дугъу учв неинки ужур библиотекарси, хъа гьацира бажаранлу шаирси улупну. Чан шиърар устадвалиинди урхубра дугъан заанвал ву». Республикайин милли библиотекайин ва РД-йин писателарин Союздин терефнаан Багьарат Ильясова Гьюрматнан грамотайиинди ва кьиматлу пешкешариинди лишанлу гъапIнийи. Табасаран райондин ЦБС-диъ лихури дугъан 26 йис ву. Аьхиримжи 5-6 йисан дугъу учв яратмиш апIру касси улупну: урус ва азербайжан чIалариинди шиърар дикIура. Чан сабпи шиир Багьаратди дадайиз бахш гъапIнийи. 2007-пи йисан гъубшу «Рюгьнан гьяйбатлу гьиссар» республикайин конкурсдиз дугъу чан «Ккуни уьлке» мяъли тувнийи. Конкурсдин жюрийи думу эсериз заан кьимат тувнийи ва автор РД-йин культурайин Министерствойин терефнаан Гьюрматнан грамотайиинди лишанлу гъапIнийи. Багьарат Жамалутдиновна райондиъ гъягъру культурайин серенжемарин бажаранлу тешкилатчисира машгьур ву. Дугъу, райондиъ гъягъру йигъинжагъариъ жанлуди иштирак шули, жюрбежюр темйириан сценарйир дикIуру. Райондиъ гьар йисан гъябгъру «Хядарихьна гам» конкурсдин жюрийин член вуди, конкурсантарин бажаранвализ дугъри, дюз кьимат туври, жигьиларин арайиъ бажаранлудар агуз кюмек тувра. «Юлдаш» прогимназияйиъ тешкилатчивалин вазифйир тамам апIури, урхурайидариз дугъу «Йиз дада», «Аяз аба», «Елка, ялавлу йибхь» мяълйир ва шиърар яратмиш дапIна. «Багьарат Ильясова ич коллективдин утканвал ву», - гъапнийи ич сюгьбатнаъ «Юлдаш» прогимназияйин завуч Гьаваханум Исмяиловнайи. «Юлдаш» прогимназияйиъ тешкилатчивалин вазифйир тамам апIури, Багьарат Ильясовайи хореографияйин дарсар кивру Э.Аьлимурадовдихъди ялхъвнар тамам апIру десте тешкил дапIна. Думу десте райондин серенжемариъ иштирак шула, пешкешнан йишвар гъадагъура. 2010-пи йисан гъубху «Учу бажаранлуйир агурача» конкурсдиъ иштирак духьну, ялхъвнарин дестейи «Хореография» номинацияйиан 1-пи йишв гъадабгъну. Гьамшвахъди пуз ккундузуз, 2010-пи йисан вари халкьарин дишагьлийирин Йигъахъди аьлакьалу вуди, РД-йин Президент М.М.Мягьямедовди республикайин районариан дишагьлийир кьабул гъапIнийи. Табасарандин дишагьлийирикан думу гюрюшдиз Багьарат Ильясовайиз теклифнан кагъаз гъафнийи. Му теклиф, гьелбетда, ляхниъ гъазанмиш гъапIу хъуркьувалар себеб вуди гъабхьиб вуйи. Табасаран райондин культурайин отделин заведующий Къ.Къазимягьямедовди дугъкан гьамци кIура: «Библиотекайиъ лихури, Б.Ильясова урхрударихъди гьарган аьлакьайиъ шулу. БицIи урхрударихъди китабдин гьяфтйир, литературайин викторинйир ва жара серенжемар гъахура. Дицисдар серенжемари бицIидарин аьгъювалар артмиш апIуз, китабдихьна, аьгъюваларихьна янашмиш хьувал ужувлахъинди илтIибкIуз кюмек тувру». «Библиотекайиз гъюру урхрударин кьадар аьхиримжи йисари бицIиб ву. Гьамус библиотекйириз цIийи китабарра дицикьан гъюри амдар, - къайд гъапIнийи Багьарат Жамалутдиновнайи ич сюгьбатнаъ, - хъа учу ляхин тамам апIбан дережа, активвал цIиб дапIнадарча». Къ.Къазимягьямедовдин гафариинди, Табасаран райондин ЦБС-дин ляхин дережайиъди тешкил дапIна. Райондиъ ляхник кайи 44 библиотекайин ляхнин гьякь-гьисаб Б.Ильясовайин хилариан гъябгъюра. Б.Ильясова «РД-йин культурайин лайикьлу гъуллугъчи» гьюрматлу ччвур тувбаз улупна. Лазим вуйи документар министерствойиз хъадаъна. | |
| Просмотров: 1047 | Загрузок: 0 | | |
| Всего комментариев: 0 | |