Главная » Файлы » "Табасарандин нурар" [ Добавить материал ]

Аьхю хизан абайин дамагъ ву
04.04.2013, 16:11

  Яш уьмрин гьацI,ан удубчIвну ашра, бязидар жигьилди, утканди гъузру. Анжагъ дицисдар цIибтIан шулдар. Йиз фикриан, Разьяханум Мирзакеримовара гьацдарин жергейиан гьисаб апIуз шулу. Бедбахтвалин дюшюшнакк ккахъну, 1985-пи йисан армияйиан дугъан балин майит гъабхиган, думу варибдихъ мягьрум гъахьнийи. Гьамциб дерднан имтигьяндиан удучIуз кьувват дугъаз чан аьхю хизанди тувну. Хизандин далу, жилир Мирзакеримов Гьяжибалайи думуган дугъахьна вуйи ккунивал, камаллувал, шадвал, кIван ачухъвал хьубди артухъ гъапIну.
   Разьяханум Аьлипашаевна 1945-пи йисан Табасаран райондин Туруф гъулаъ аьхю хизандиъ бабу гъахну. 18 йис тамам гъабхьиган думу швуваз тувру.
   - Узу бицIиди имидира зегьмет зигуз, хулан, хянан марццишнар апIуз ккунир вуйза. Мал-къарайин гъайгъу зигури, чюлин ляхнариъра иштирак шуйза. 7-пи класс ич гъулаъ ужудар кьиматариинди ккудубкIнийза. Хъа урхувал давам апIру мумкинвал адайзуз. Хъа ихь гъуларин инсанарра фицдар вухъа? Шубар гъирагъдиз адауз ккунидар дайи. Зегьметнахьан сабанра ярхла шулдайза. Узухъди йиз чйирра (4 чи вуча) жалб апIури шуйза, - кIура Разьяханумди.
   Дугъан уьмрин юлдаш Гьяжибалайи гьякьикатдиъра гьаци вуйиб субут апIру далилар гъахну:
   - Учу 1963-пи йисан февраль вазлиъ эвленмиш гъахьунча. Разьяханумди чан уьмриъ вари кьувватар ужуб ва марцци ляхин апIбаз сарф гъапIну, инсанариз, гъуни-гъуншйириз фукьан вушра кюмекар тувну. Учу гъулаъ амидира дугъу чав зегьметкеш вуйиб улупуйи.
   Разьяханум 1964-пи йислан 1975-пи йисазкьан Туруф гъулан медпунктнан санитаркади гъилихну. Хъа, Дербент шагьриз кюч хьпан кьяляхъ, думу центральный почтайиъ кагъзар, газатар жара апIрурди гъилихну. 14 йисан мушваъ фидакар зегьмет дизигну, Дербентдин рягьимлуйирин идарайиъ пенсияйиз удучIвайизкьан лихуру.
   Гьаму касдихъди гафар апIруган, дугъан яшар фукьан вуш аьгъю апIуз шулдайи. Гьаз гъапиш дугъан рюгь жигьилвалихъди абцIнайибси рябкъюйи.
   Разьяханум ва Гьяжибала саб йишв,инди яшамиш шули 50 йис ву. Гьаму вахтна дурари 4 байна 6 риш аку дюн,яйиина адагъну. Дурарин сар риш, сабпи нумрайин СОШ-дин (Дербент) сабпи классдиъ урхурайиган сар нярс касди машиндикк ккаъну. Мура бабан юкIв уьбгъру аьхю дерд шулу. Гьамусяаьтна мурарин 3 байна 4 риш эвленмиш дапIна, гьардиз чпин хал-хизан а. Сар риш абайихъди ва бабахъди яшамиш шула.
   Дупну ккунду, мурарин хизанар, язнйир, шубар уч духьнайиган, бицIи гъулан «аьхю» жямяаьтназ ухшар ву. Сабишв,инди гъадабгъиш, интернационал хизан ву. Сар балихь урус дишагьли хьа, сар риш азербайжан бализ, сар лезги бализ швуваз душна. Дурариз 20 худул, 3 гудул а. Дурари Разьяханумдин ва Гьяжибалайин юкIвар шад апIура.
   - Узу, йиз вари кьувватар, тажруба уч апIури, гележегдиъ ужуб, гъулай, ислягь уьмриина инанмиш,вал хури, чIат, гъирагъдиъ айи йиз баяриз, шубариз, худлариз тербия тувуз шулайибдиин гьеле рази вуза. Дурарихъди узу Интернетдиан гьар йигъан улхураза. Дурарикан, наан ашра, ватанперверарди гъузуб тIалаб апIури шулза. Йиз жилир Гьяжибалайин метлебра гьациб ву. Учу ич аьхю хизандиин дамагъ апIурача, - кIура Разьяханум Аьлипашаевнайи.
   Рякъбариан жигьилди вушра, Разьяханумдин сагъламвализ эсер апIура. Думу зегьметнан ветеран ву. 8-пи мартдин дишагьлийирин Йигъ мубарак апIури, дугъаз, хизандиз уьмриъ шадвал, сагъвал, ислягьвалин марцци завуъ аку хядар рякъювал ккун апIурхьа.

Ш.Гъазимягьямедов,
Дербент шагьур

Категория: "Табасарандин нурар" | Добавил: Admin
Просмотров: 868 | Загрузок: 0 | Рейтинг: 0.0/0
Всего комментариев: 0
avatar