Главная » Файлы » "Табасарандин нурар" [ Добавить материал ]

50 йис – мялимвалин рякъ
29.08.2011, 14:03
Табасаран райондин АхьитI гъулан кьялан мектебдин ккергъбан классарин мялим Гьябибуллагь Нурялиевди аргъаж шулайи наслариз аьгъювалар ва тербия тувбан чюлиъ 50 йисан зегьмет гъизигну ва гъира гьадму баркаллу ляхин тамам апIура.
1958-пи йисан Хючнаарин кьялан мектеб ккудубкIу Гь.Нурялиев Дербент шагьрин педучилищейик урхуз кучIвру ва 1961-пи йисан думу тафавутлувалиинди ккудубкIуру. Гьадму йисан АхьтIарин миржид йисандин мектебдиъ ккергъбан классариъ лихуз хъюгъру.
- Узу 1941-пи йисан Табасаран райондин АхьитI гъулаъ колхозникдин хизандиъ бабкан гъахьунза. Ич адаш 1942-пи йисан Ватандин Аьхю дявдиъ кечмиш гъахьнийи. Учу (узу, йиз аьхю гъардашна чи) уьрхюб ич дадайин гьюнариин алабхъну. Учу, «дявдин бицIидар», думу гъагъи йисари ич дадайи гашу йихуз гъитундар, - кIваин апIура Гьябибуллагь Мутелимовичди.
Гьябибуллагь Мутелимовичди чаз багъри кас, чан дада, гъира баркаллувалиинди кIваин апIура.
1962-1964-пи йисари СССР-ин Яракьлу Кьувватариъ чан ватандаш’валин буржи тамам апIбан кьяляхъ Гь.Нурялиевди сифте Рушвларин ккергъбан мектебдиъ, хъасин (1965-пи йислан мина) АхьтIарин кьялан мектебдин ккергъбан классариъ мялимвал давам апIуру.
- 1965-пи йисазкьан гьязурвалин классдиз ургуд йис дархьи баяр-шубар кьабул апIурадайи. Гьадму йисан ич мектебдин гьязурвалин классдиз сабпи ражну ва эксперимент вуди 6 йис дубхьнайи баяр-шубар гъадагънийи ва эксперимент гъабхуз узуз табшурмиш гъапIнийи, - кIваин апIура Гьябибуллагь Нурялиевди. –Думу бицIидарихъди ляхин гъабхбан тажруба гъадабгъуз узуна ич мектебдин завуч А.Бедирханов Гуниб райондин СогратIл (Согратль) гъулаз гьаънийи. Думуган душваъ Дагъустандин гизаф районариан ккергъбан классарин мялимар уч гъахьнийи. Учу гъубху экспериментди, йирхьуд йис гъабхьи баяр-шубар мектебдиз кьабул дапIну, дурариз хъуркьувалиинди аьгъювалар тувуз шлувал субут гъапIнийи. Гьаддихъан мина мектебдиз баяр-шубар йирхьуд йис яш гъабхьиган кьабул апIуз хъюгъну.
Гь.Нурялиевди 1969-пи йисан ДГПИ-йин филологияйин факультет заочно ккудубкIуру ва гьаддихъан мина гизаф йисари АхьтIарин кьялан мектебдиъ урус чIалнанна литературайин дарсар киври гъилихну.
Гьябибуллагь мялим 21 йисан мектебдин завучди ва дарснаъ дару ляхнарин тешкилатчиди гъилихну. Думу йисари дугъу гъизигу зегьметнан натижайиъ баяр-шубариз аьгъювалар ва тербия тувбан ляхин заан дережайиз удубчIвнийи. Думу йисари АхьтIарин кьялан мектебдин мялимари ва урхурайидари заан хъуркьувалар гъазанмиш апIуйи. Дурари, УО-йи тешкил апIру Олимпиадйириъ жанлуди иштирак шули, гизаф предметариан пешкешнан йишвар гъазанмиш апIури гъахьну.
1996-пи йислан мина гъийин йигъазкьан дугъу ккергъбан классариъ ляхин апIура. Аьшкь ади тамам гъапIу ляхнин натижйир ужудар шулу. Гъи дугъан ученикари райондин, республикайин, уьлкейин халкьдин мяишатдиъ чпин пишекарвалин вазифйир хъуркьувалиинди тамам апIура.
Улихьна йигъари узу, Гь.Нуря-лиевдин гьякьнаан саб-кьюб гаф пуб ккун апIури, АхьтIарин кьялан мектебдин директор М.Гьяжиевдихьна илтIикIнийза. Дугъу гьамци гъапнийи: «Ич мектебдиъ варитIан аьхю тажруба ва варитIан аьхю гьюрмат айи мялимарикан сар Гьябибуллагь Мутелимович ву. Думу чан гьарсаб дарснахьна жавабдарвалиинди янашмиш шулу, гьарган ляхнин тажрубайиъ цIийи къайдйир агбиин машгъул ву. Дугъу чан аьгъювалар мюгькам апIбиин гъира аьхю зегьмет зигура. Дугъу кми-кмиди текрар апIури шулу: «Чан аьгъювалар сикин дарди артухъ апIурдарш, мялим мялимди гъузурдар».
Дугъу зегьмет зигура ва ляхниъ хъуркьуваларра гъазанмиш апIура. Гьарсар бицIирихьна хусуси къайдайиинди янашмиш хьпан, гьарсарин кIвахьна рякъ абгбан, гьарсар урхурайирин удукьрувалар за апIбан зиин зегьмет зигура. Баяр-шубарин, мялимарин ва абйир-бабарин терефнаан дугъу аьхю гьюрмат гъазанмиш дапIна.
Гь.Нурялиевди дарс киву ва тербия туву урхурайидар заан аьгъювалар айидар шулу. Ич мектебдин аьхюну классариъ лихурайи мялимарикан гьарсари урхбан йисан эвелиъ дугъан класс чахьна тувуб ккун апIуру. Зигурайи марцци зегьметназ лигну, му ужур мялимдиз, тербиячийиз, жямяаьтлугъ касдиз мектебдин администрацияйин, райондин УО-йин ва «Табасаран район» МР-йин главайин, РД-йин образованиейин Министерствойин терефнаан швнуб-саб ражну Гьюрматнан грамотйир, кьиматлу пешкешар тувну. ДумутIанна гъайри, Гь.Нурялиев «Учитель-методист» ва «Зегьметнан ветеран» ччвурарин сагьиб ву».
- Узу цци шубуб юбилейин сагьиб вуза, - ич гюрюшдиъ зарафат гъапIнийи Гьябибуллагь Мутелимовичди, - уьмуми яш 70 йис, мялимвалин пише тамам апIури 50 йис, эвленмиш духьнура 50 йис тамам шула.
Гь.Нурялиев ужур мялимси, тербиячиси, аьхю ва албагу хизандин кIулра ву. Дугъу чан уьмрин юлдаш Судабейихъди 6 велед (кьюр байна юкьур риш) аьхю ва тербияламиш гъапIну. Дурарикан хьур (Замир, Назир, Зюгьраханум, Султанат, Раисат) абайин рякъюъди гъушну. Дурар мялимар ву. Хъа сар шуру, (Хунчаназди) духтирвалин пише ктабгъну.
Гь.Нурялиевдикан улхури, дугъан юлдаш Гь.Гьюсейновди ич гюрюшдиъ къайд гъапIнийи:
«Узуз Гьябибуллагь Мутели-мович варидизтIан ужуди аьгъязуз, фицики дугъахъди лихури гизаф йисар вуйиз. Думу заан устадвал айи мялим ва тербиячи ву. Дарсариъ дугъу баяр-шубариз, заан аьгъюваларси, инсанвалин, эдеблувалин тербияра тувру. Марцци юкIв, заан эдеблувал айи, багахь хьайириз кюмекнан хил гьачIабккуз гьязур вуйи думу кас ужур методист, жигьиларин насигьятчи ву. Заан устадвал айи мялимси, жямяаьтлугъ касси, думу намуслу ва нумуналу инсансира машгьур ву».
Чан шубуб юбилейихъди ва улубкьурайи цIийи урхбан йисахъди тебрик апIури, аргъаж шулайи наслиз дерин аьгъювалар ва ужуб тербия тувбаъ фидакар зегьмет зигурайи Гьябибуллагь Мутелимовичдиз мюгькам сагъвал, ярхи уьмур, хизандиъ хушбахтвал, гележегдиъра чан баркаллу ляхниъ хъана заан хъуркьувалар хьуб ккун апIидихьа.
Категория: "Табасарандин нурар" | Добавил: Admin
Просмотров: 762 | Загрузок: 0 | Рейтинг: 0.0/0
Всего комментариев: 0
avatar