Главная » Файлы » "Табасарандин нурар" [ Добавить материал ]

33 йисан мялимвал апIура
31.07.2012, 21:29
 Аьбдулрафик Исаевдин ччвур Дербент шагьрин жямяаьтлугъдин арайиъ машгьур ву. Му Дербент шагьрин кьялан уьмуми образованиейин 19-пи мектебдиъ технология предметдин мялимди лихура. Мугъу, хъуркьувалариинди ляхин апIбахъди сабси, чан дарсарин материал урхурайи баяр-шубарихьна заан ери ади рубкьбан, ужудар натижйир гъазанмиш апIбан цIийивалар агура. 
  Аьбдулрафик Садикьович 1957-пи йисан Хив райондин Заан Яракк гъулаъ бабкан гъахьну. Кьялан образование гъадабгъбан кьяляхъ мугъу 1983-пи йисан ДГПИ-йин биологияйинна химияйин факультет ккудубкIуру. 1987-пи йисан Ставрополь шагьриъ профильный аьгъюваларин курсарра ккудукIуру. Чан мялимвалин 33 йискан 18 йисан мугъу Дербент шагьрин 19-пи СОШ-диъ, аьхю гьюрмат айи коллективдин арайиъ, ляхин апIура. Мугъу учв ужур мялим - пишекар, тербиячи вуйиб тасдикь гъапIну. Аь.Исаев заан категорияйин мялим ву.
  Технологияйин мялимди лихури, мугъу теорияйин аьгъювалар практикайин месэлйир гьял апIбаъ ишлетмиш апIбаз аьхю фикир тувра. Дарсариъ мугъу шей;арин кIалбар, конструкцйир гьязур апIуз улупура. Мектебдиъ урхурайидарин хилариинди экспонатар, сувенирар гьязур дапIна. Жвуван вазифйирихьна яратмиш апIбан къайдайиинди янашмиш шули, жигьил мялимди чан ляхниъ жюрбежюр усулар ишлетмиш апIура, дарсар маракьлуди, урхурайидарин активвал за шлуси гъахура.
  Технологияйин мялимди «Мастерок» кружокдин дарснаъ декоративно- прикладной искусствойин аьгъювалар тувра. Гъабхурайи ляхни ва дарсари, кружокариъ ишлетмиш апIурайи къайдйири ужудар натижйирра тувра. Дербент шагьриъ ва республикайиъ гьар йисан гъахурайи конкурсариъ, декоративно-прикладной искусствойин выставкйириъ ва технология предметдин олимпиадйириъ мугъан ученикари ужудар хъуркьувалар улупура. 2006-2012-пи йисари регионарин образованиейин выставкйириъ Аь.Исаев ва  мугъан ученикар республикайин технический ва художественно-прикладной искусствойин Центрин дипломариинди ва Гьюрматнан грамотйириинди лишанлу дапIна.
  Аьхиримжи шубуд йисан мугъан 6 ученик республикайин олимпиадйириъ гъалибчйир ва пешкешнан йишварин сагьибар духьна. Технология предметдиан республикайин олимпиадйириъ Ибрагьим Куртаевди сабпи йишв, Кемран Къаибхановди, Эльман Аьлиевди, Асланбег Керимовди кьюбпи йишвар, Аьбдул Айдемировди, Хизри Мурадовди ва Максим Мягьямедовди шубубпи йишвар гъадагъну. 
  Аьбдулрафикдин авторитет чпин мектебдин коллективдин арайиъ аьхуб ву. Мугъу мектебдин технология предметдин мялимарин методикайин объединениейиз регьбервал тувра. Мугъу сарпирди мялимарин яратмишарин десте тешкил гъапIну. Думу дестейи предметарин декадйир, выставкйир ва олимпиадйир гъахура. Мугъу жигьил мялимарихъди дидактикайин материалариан семинарар-практикумар, мастер-классар гъахура. Мугъу 2010-пи йисан пишекарвал за апIру курсариъ урхурайидарин улихь «Технологияйин дарсариъ заан дережайин аьгъювал тувуб» мастер-класс тувну.
Абдулрафик Садикьовичди Дербент шагьрин яшнакк ккуркьну адрударин социалинна реабилитацияйин центриъра яратмишарин ляхин гъабхура.
  Бажаранлу мялимдин зегьметназ мектебдин руководствойи, урхурайидари ужуб кьимат тувра. Государствойи мугъан зегьмет РФ-йин уьмуми образованиейин Гьюрматлу гъуллугъчи, Урусатдин профсоюзарин 90 йисаз тялукь медаль, РД-йин образованиейин Министерствойин ва ГУО-йин грамотйир тувбиинди лишанлу дапIна. Зигьимлу баярихъди ужуб ляхин гъабхбаан 2011-пи йисан Аьбдулрафик Садикьовичдиз вари Урусатдин педагогикайин собраниейин чухсагъулин кагъаз ва пешкеш тувну.
  55 йис тамам дубхьну, шубур веледдиз ва гизаф урхурайидариз тербия туврайи мялимдиз сагъвал, уьмриъ бахт хьуб ккун апIурхьа.
Категория: "Табасарандин нурар" | Добавил: Admin
Просмотров: 642 | Загрузок: 0 | Рейтинг: 0.0/0
Всего комментариев: 0
avatar