Главная » На табасаранском языке
« 1 2 3 4 »
Пирмягьямад Асланов

Гъабгъу зав'ан йиф гъюра -
Аьжаб кьюрдун мешреб а.
Гьюкум хапIра аязну,
Тахт лизибди дабалгна.

Яркурна кюл суст гъахьну,
Нирар'ин миркк гъизигну.
Зегьмет даккни темплиин
Дивандин йигъ улубкьну.

Шлиз чIьуру вахт ву кьюрд?
Шлиз думу багьа дар?
Сагъ аязна лизи йиф
Мани хьадну дихъурдар.

Адар кючиъ бишируг,
Адар кифир кIару чIамчч.
Дюн'я марцци дубхьна гъи,
Жилар'ин ал нурлу чарч.

Дамагънаъ а бицIидар,
Мярхяриз гъуллугъ кади.
Вардин уьру ву гарцIлар,
Кучвухури зарб кади.

Гагь ергури, гагь дахъри,
Дурар йиф'ин ву рази.
ЧIат дийигъна кьаби кас,
Набалугъ яш кIваз хури.
Нравится
Категория: На табасаранском языке | Просмотров: 2046 | Добавил: Admin | Дата: 15.06.2011 | Комментарии (0)

Манаф Шамхалов

Сифте дада пуз аьгъю шул бицIириз,
Хъасин дугъу "бабаъ" тIалаб апIуру.
Ижмиб вушра думу никкдин силбариз,
Дугъу думу хушниинди чIвубгуру.

Аьхю хьиган, дубхьну ккунду дугъаз чан
Иман вуйи уьлин кьацIра чарасуз.
Уьл адру кас, саб шак адар, шул начан,
Уьл адруган, машквар, мажлис ву дадсуз.

Уьлиз гьюрмат дапIну ккунду, думу дарш,
Инсаният шулу аку дюн'яйихъан.
Ав, ав, уьлиз гьюрмат апIин, ватандаш!
Думу ликрикк ккипну гъягъюз ккун мапIан.


Категория: На табасаранском языке | Просмотров: 2148 | Добавил: Admin | Дата: 15.06.2011 | Комментарии (0)

Гьяжимурад ТIаибов

Хифран гьар

Гъулан кIулихъ гъаравул ву хифран гьар:
Сабпи ражну микIар, гъулаз рукьайиз,
Гьарихъ йивуй - ва кам духьну кьувватар,
Зяиф гъабхьи микI абхьури гъулаъ йиз.

Гъулаъ айи радиоси рабхуй гьар:
Хъюгъяй жакьвар дид'ан улхуз гвачIинтIан,
Саб йишвхъанди шуйи рахури луфар,
Тму терефнаан ебхьуйи "чIяв-чIяв-чIинтIа".

Хиф ккатIабццнай суфраси вуй хъютариз,
Дурсуй дидигъ вари хъютар юрдарин,
Йивуз ижми гъямгъмар ицци хифариз -
АцIуй турбйир кIанакк ккайи баяри.

Гъулаз гъяйиз, ригъдин сабпи нурарра
Дийигъуйи, гъяхьну хифран кюлеригъ.
Гьарин кIанакк дахьуй малар-марччарра,
Хифру мичIли апIуйи чпиз хьадан ригъ.

Ули уьбхру йишв вуйи гьар баяриз:
Лигуй гьаргъян, гъюраш жамрар швушв хьади.
Му гьар вуйи вартIан шадуб шубариз
Жуккмар ккитIуз гъюйи дурар тIил хьади.

Хъа накь мягьрум гъапIну сарин хилари...
Имдар вари хифрахьан вуй девлетар...
Рябгъюрачвуз? Гъул гъабхура микIари,
Наан дусрушра аьжуз духьна луфар.

Категория: На табасаранском языке | Просмотров: 1247 | Добавил: Admin | Дата: 04.05.2011 | Комментарии (0)

Пирмягьямад Асланов

Мархь

Жумарт хили тIубччвурайи
Сиф'анси, мархь хъюбгъна убгъуз
Гъизилгюли чубхурайи
КIул за гъапIну, цIадлар урхъуз.

Урши кIажардижикIну чан,
Кюкдин хярлан алдатну ул.
УкIар-кIажар вари бирдан
Гьяйбатниин гъахьну машгъул.

Рягънихъан гъи шад ву гизаф -
Рягънин хулар ацIну а шту,
Залданарикк, утIубччвну каф,
ИлтIибкIура гьялакди чарх.

Бистанчийин кьяши гъахьну
Ликрилан кIул'ина палтар,
Вушра дугъу тамам гъапIну
Бистниъ айу варлу ляхнар.

Памадрарин ацIуз хъюгъна
Уьру нурар туврайи гарцIлар.
Гулдин цIабар дазаргну а,
Кяргъна арфанйирин фунар.
Категория: На табасаранском языке | Просмотров: 1097 | Добавил: Admin | Дата: 04.05.2011 | Комментарии (0)

Гьяжимягьямад Гьяжиев

Хьадан гвачIин

Пагь, успагьиб дарин гъи гвачIин хьадан! -
Марцци гьава гъюра дагъларин зиълан.
Нири табхьра жакьварихъди шад мукьам.
Кюкйир табиаьт балгбиин ву мудам.

Гьарарин кьакьчарикан рягъ ктатури,
Таза микI либцура, хуш гьенг йивури.
Ккебгърайи хушбахтлу йигъ'ин шад вуди,
Гьарин кIажарулхура лап назукди.

НивкI'ан хъибгу ригъди, дапIну уьру маш,
Хулаз гъапIу рягьятназ ваз, чан гъардаш,
Завуз дуфна вари аьламдин шагьси,
Табиаьтдиз цIийи хиял хурайи.
Категория: На табасаранском языке | Просмотров: 1020 | Добавил: Admin | Дата: 04.05.2011 | Комментарии (0)

1-5 6-10 11-15 16-18