Шюшеханум Керимова

Убкъну булагь. Имдар гьулаъ
Дидин мяълира ебхьури.
Ицци т1яаьм булагъдин штун
Ими гъира кIваин хури.

Гъубзна ичI. Гьари уьбхюра
Багьалу булагьдин сирин.
Умуд кади гьар либгура,
МикIра дубхьна душвахь сикин.

Миж ка гьарин, абцIур дагар,
Артухь шул кьаблин кьувватра,
Уткан швушвра гъюр, хъипну гвар,
Мяълира хъудрубт1ур затра.
 

Ш.ШАХМАРДАНОВ

Афтафа арсран... чяхири абцIнайи.
Гюзелси дарин хуб шумал!..
Ва дахьна шубуб к1арч, ушвар арццнайи,
Дидин ликарихь, духьну лал.

Фтихъ дахаргнайк1ан к1арчар?
Чяхирихъ - ширейихъ жилинна ригьдин?
Дарш умун лигбахъ афтафин? -
К1арчар! Дарш учвузра аьгьяйин начар?!

Марччлин нис... дубхну имбу сив'ан. Таза.
Лич1вун лаваш... ими гьеле убцури -
Манишин, дидлан шулай за,
Тюнт ву, тавхана вуйибси либцури.

Хъа чюнгюр... албагнай симар,
Дубсна суфрайихь, йивну гьюн, фурслуди...
Гьамусяаьт гъюру хялар...

З.ХАНМАГОМЕДОВА

Йиз юкIв али Гьюри-мелек,
Тадагъда йиз, аман фелек.
Ччвурра вуйи Угълангерек,
Духну, яснаъ ахъундазу.

Зуз ккун дубхьну, ктабгъу гюл,
Кюкйирихьди дабалгнай чюл.
Хас’ят умун, юкIв гегьенш гьюл,
Эллер, узхьан гьадахъда йиз.

Йип, му вуйин, дада, инсаф?
Хъимдарда зухъ кIуру саб гаф.
Чюлиъ ахъза йивури даф?
Хил Межнумдин хилиъ ивну.

Ичв такабур, гъюдран ериш,
Багъдиъ хъубкьу таза йимиш.
Хъутругъарчва, эллер, гьапиш,
Хиллан ппази гьебгунда йиз.

Ичв такабур дагълу жейран,
Мухриъ кабхъну гъатху мержан,
Зем-земдин шид айи фейжан
Абхъну хиллан гъюбгъюнда йиз.
 
Асли дукIну, Керим гьаз ву?
Думу симар алдру саз ву.
Ширин гъузну, Фяргьят дукIну,
Узкан Фяргьят гьаз гьахьундар?

ЮкIв улубкьну кьисмат хьайиз,
Гьадахъзу, яр хулаз гъяйиз.
Риш ву ккунду увуз кIайиз,
АйитI багърум гъубгунда йиз.

Ригъ алабхъну, йигъ ву сирин.
Дердер гъашида йиз дерин.
Гаргар илмиди йиз хил’ий,
Ппази хиллан гьебгунда йиз.

Уву гъабхунва йиз уьмриз берекет,
Ургуб хяд кадагъну тувунва завкан,
Уву ивунва йиз уьмриъ аьдалат,
Бахтнан кунц1 гъап1унва му йиз уьмрикан.

Ургуб хяд йиз, ургур велед - к1ван шадвал,
Шадвали ва бахтну ац1най ургуб юк1в.
Учву гъахуриз аьбкъинай акувал,
Аьбкъюз мигъитанай дугъаз бахтсуз ч1ук1в.

Валлагь, бабт1ан зина дюн яйиъ адар,
Велед бадали дурари жан дивру.
Бабарин к1ван манишин гьархну ккундар,
Уьмрин аьхириз жандиъ ялав гъитру.

Учву хядар - хъа ичв баб ву ук1у зав,
Чан хабаъ аъну учву дидиснайи.
Учву кюкйир, хъа ичв баб гюрчег гьалав,
Накьишарди гьалвин жил ин каънайи.

Баб багъ ву, хъа учву йимишдин гьарар,
Йимишарихъди арбаб ап1инай баб.
Кьаби хьиган бабар уьрхюб ву гьунар,
Думу ауз гьат1абццай ичв мани хаб.

Баб кюкю ву хьадукру адабшвнайи,
Хъа веледар ву гьадму кюкдин ц1абар.
Бабу веледдихъ уьмриъ дизигнайи
Зегьметнакан учвуз айк1ан зат хабар.

Гъюдлиб вуйган гъурдин к1кул,
Харатчийриз ккуниб вуйи.
Тувдашра лап кьандиз давам
Раккнар-улдар гьаддин шуйи.

Ижми к1ак1ул а модайиъ,
Хиф, пирп, мяхъв ва гьямшаживан.
Мюгькемуб ву диллиг дидин
Гъуллугънаъ гъубзди насларин.