КIваин илмийиз, илмийиз
ЯгъчIвурна, садпи йисан хьад.
Хъа гьич кIаълан гъябгъюрин йиз
Думу хьадан хусуси дад.

Июндин къанна кьюд, элгьет,
КIюрд гъапIу йигъ цIюхъюм хьадкан,
Совет инсанарин, гьелбет,
Аьсрариъ гъябгъюрдар кIваълан.

Гьархру улихьдин мяълийир,
Мухриъ ахьру вардин кIулар.
Дургру марцци аьлхъбар-гьягьйир,
Нивгъарихьди ацIру улар.

Жилар гьязур шулу рягъюз,
Ватандин азадвал уьбхюз.
Гьятта бицIидарра гъулан
Сабпну аьхю шул му йигъан.

Саб вуйи варидарин мурад:
Ихь гъанлу душмнар апIуб рад.
Фашизмйиз гъабхьундар аьгъю
Ихь халкIдин кьуватнакан аьхю.

Халкь гъалиб гъахьну душмниин
Аьх дапIну чан вари аьзаб.
Фашизмйи чав кипу цIиин
Чануб гъабхьну гъубжу кабаб.

Гьаци шулу гьарсар душмниз,
Ният гъапIу цIийи дявдиз -
Му йиз Ватандин жаваб ву,
Хъа дустраз дидин юкIв шад ву.

КIваин илмийиз, илмийиз...
Ухьу гъибтнура ккун кIваин,
Сарун рякъ тутрувуз дявдиз,
Сарун дяви дархьуз жил`ин.