Гъябгъюрава, йиз биц1и нир, гялакди,
Гъванарик кубк1ган шула яв гюрчег сес.
Гъубзуз шули адар увхьан сикинди,
Яв сеснура кап1ри а йиз к1вак гьевес.

Уьткем вуяв лап гюзгюси марцци шид,
К1ваз ширин ву яв к1урай гюрчег мяъли.
Йигьан уву рякъру духьназа шагьид,
Фукьан бахтлу йигьар тувунва уьмриз.

Дюзен нирхьан пуз шулдар явсиб мяъли,
К1вак гьевесра кап1уз шулдар увхьанси.
Дагълуйиринси ву явра гьялак юк1в,
Аллагьдикан увуз гъурубкьу пай - ч1ук1в.

Хъа язухъ ву эгер увук кубч1виш хъял,
Хъухърум-гугрум гъябгъруган т1урфнар дургъну.
Думуган агъдарвуз яв дуст, яв мягьял,
Дагълар-дерйир ап1ну селлер гъягюру.

Йиз биц1и нир, йиз к1ван шадвал, абадвал,
Йиз биц1и дерейин вуй аъхю девлет.
Яв гьарсаб ц1адли хури а акувал,
Артухъ ап1ури ихь арайиъ гьюрмат.