З.ХАНМАГОМЕДОВА

Йиз юкIв али Гьюри-мелек,
Тадагъда йиз, аман фелек.
Ччвурра вуйи Угълангерек,
Духну, яснаъ ахъундазу.

Зуз ккун дубхьну, ктабгъу гюл,
Кюкйирихьди дабалгнай чюл.
Хас’ят умун, юкIв гегьенш гьюл,
Эллер, узхьан гьадахъда йиз.

Йип, му вуйин, дада, инсаф?
Хъимдарда зухъ кIуру саб гаф.
Чюлиъ ахъза йивури даф?
Хил Межнумдин хилиъ ивну.

Ичв такабур, гъюдран ериш,
Багъдиъ хъубкьу таза йимиш.
Хъутругъарчва, эллер, гьапиш,
Хиллан ппази гьебгунда йиз.

Ичв такабур дагълу жейран,
Мухриъ кабхъну гъатху мержан,
Зем-земдин шид айи фейжан
Абхъну хиллан гъюбгъюнда йиз.
 
Асли дукIну, Керим гьаз ву?
Думу симар алдру саз ву.
Ширин гъузну, Фяргьят дукIну,
Узкан Фяргьят гьаз гьахьундар?

ЮкIв улубкьну кьисмат хьайиз,
Гьадахъзу, яр хулаз гъяйиз.
Риш ву ккунду увуз кIайиз,
АйитI багърум гъубгунда йиз.

Ригъ алабхъну, йигъ ву сирин.
Дердер гъашида йиз дерин.
Гаргар илмиди йиз хил’ий,
Ппази хиллан гьебгунда йиз.

Уву гъабхунва йиз уьмриз берекет,
Ургуб хяд кадагъну тувунва завкан,
Уву ивунва йиз уьмриъ аьдалат,
Бахтнан кунц1 гъап1унва му йиз уьмрикан.

Ургуб хяд йиз, ургур велед - к1ван шадвал,
Шадвали ва бахтну ац1най ургуб юк1в.
Учву гъахуриз аьбкъинай акувал,
Аьбкъюз мигъитанай дугъаз бахтсуз ч1ук1в.

Валлагь, бабт1ан зина дюн яйиъ адар,
Велед бадали дурари жан дивру.
Бабарин к1ван манишин гьархну ккундар,
Уьмрин аьхириз жандиъ ялав гъитру.

Учву хядар - хъа ичв баб ву ук1у зав,
Чан хабаъ аъну учву дидиснайи.
Учву кюкйир, хъа ичв баб гюрчег гьалав,
Накьишарди гьалвин жил ин каънайи.

Баб багъ ву, хъа учву йимишдин гьарар,
Йимишарихъди арбаб ап1инай баб.
Кьаби хьиган бабар уьрхюб ву гьунар,
Думу ауз гьат1абццай ичв мани хаб.

Баб кюкю ву хьадукру адабшвнайи,
Хъа веледар ву гьадму кюкдин ц1абар.
Бабу веледдихъ уьмриъ дизигнайи
Зегьметнакан учвуз айк1ан зат хабар.

Гъюдлиб вуйган гъурдин к1кул,
Харатчийриз ккуниб вуйи.
Тувдашра лап кьандиз давам
Раккнар-улдар гьаддин шуйи.

Ижми к1ак1ул а модайиъ,
Хиф, пирп, мяхъв ва гьямшаживан.
Мюгькемуб ву диллиг дидин
Гъуллугънаъ гъубзди насларин.

Гъябгъюрава, йиз биц1и нир, гялакди,
Гъванарик кубк1ган шула яв гюрчег сес.
Гъубзуз шули адар увхьан сикинди,
Яв сеснура кап1ри а йиз к1вак гьевес.

Уьткем вуяв лап гюзгюси марцци шид,
К1ваз ширин ву яв к1урай гюрчег мяъли.
Йигьан уву рякъру духьназа шагьид,
Фукьан бахтлу йигьар тувунва уьмриз.

Дюзен нирхьан пуз шулдар явсиб мяъли,
К1вак гьевесра кап1уз шулдар увхьанси.
Дагълуйиринси ву явра гьялак юк1в,
Аллагьдикан увуз гъурубкьу пай - ч1ук1в.

Хъа язухъ ву эгер увук кубч1виш хъял,
Хъухърум-гугрум гъябгъруган т1урфнар дургъну.
Думуган агъдарвуз яв дуст, яв мягьял,
Дагълар-дерйир ап1ну селлер гъягюру.

Йиз биц1и нир, йиз к1ван шадвал, абадвал,
Йиз биц1и дерейин вуй аъхю девлет.
Яв гьарсаб ц1адли хури а акувал,
Артухъ ап1ури ихь арайиъ гьюрмат.

Гюльмагомед Расулов

        Чвул гъафиси, хъана уьрдгар тIирхура,
        Гьялаквал кади, чпин мани уьлкйириз.
        Язухъ сесну узуз чпихъди гъач кIура,
        Дийигъназа, кIул за дапIну завариз.

        Зу учвухъди, ярхла юрдназ тIирхуйза,
        За дапIну хлинццар, багъри ватан дипну,
        Йиз сикинвал ичв багарихь абгуйза,
        Гъитну фикрар, жергейин кьялаъ духьну.

        Ягъал аьршдиз кIул за дапIну за шуйза,
        Инсанарин пашманвал жил’ин гъибтну.
        Завариан кIваз мани тай агуйза,
        Дагълар – сиварилан йиз ул илтIибкIну…

        ГъитIирхну уьрдгар кIуллан йиз саб дупну,
        ГъахьундайкIан мурар гъавриъ гафарин?
        Чпин дих имдар, пашманвалра кIваъ ипну,
        Уткан жерге дубгну кIакIнахъ дагъларин…

        Нубатнан чвул дуфну а йиз ватандиз.
        Уьрдгар гъюруш кIури, хул’ан удучIвза,
        Ккилигури йиз жергейиз ничхрарин,
        Умуд кади, кIул за дапIну, лигурза.