Вардин девлет

Агь багъри чIал, агь баркаван,
Фици хьидар ув'ин гьяйран!
Дугъриданра, ккебгъур уву
Сюгьюрчи ва аьяндар ву.

Гьарсаб гафназ сурат а чан,
Гьарсаб ву гъаш - якьут, мержан.
Гьяйран шлу акв туври айтIан,
Гьарсабдик ка чан шад лишан.

Гъибихъганси марцци гъизил,
Гьар гафниин шулза рази,
Са-сабди дисурза гагьаъ -
Аьламат а гьарсаб гафнаъ.

Ихь абйири гъюбхю хазна,
Магьа гъи узухьна тувна.
Кюгьне ва сагъ чIал жюр'этлу,
Вуза ув'инди девлетлу.

Гирами дуст, бабан чIал ихь
Яв, йиз - вардин девлет вуйихь,
Яв пайра ка, явра ву бахт,
Гъуз гафариз туври кьимат.

Дадайиз

Ширин вузуз му яв нефес,
Эй, зу гъюрхю, багъри дада.
Гьарган хулаъ хьуб му яв сес,
Яшайишдин шадвал вуда.

Гьялал дапIну му яв мухрин никк,
Ктаунва адми узкан,
Дивуз улупур сабпи лик,
Гьархдариз гьич уву кIваълан.

Хъана хиял гьич сабанра,
Дариз уву гьархну лицуз.
Гьязур вуза наан ашра,
Увуз йиз жан фида апIуз.

Гьар сяаьтди, гьар минутди
Дийигъназа яв гъуллугънаъ.
Му йиз багъри шад Ватандиъ
Лицураза ади ву кIваъ.

Табасаран

Гьарсар касдиз ватан саб ву,
Бализ багъри дадаси чан.
Йиз жан нефес ув'инди ву,
Багъри макан, Табасаран.

Наан узу ккунивалкан
Гаф гъапишра, вуйиз увкан.
Ув'инди ву йиз рюгь уткан,
Йиз аьшкь, гьевес, Табасаран.

Хуш вузуз сес яв гъярарин,
Гьарсаб кюкю яв хярарин,
Жакьвлин мукьмар, ув'ин гьяйран
Вуди, кIурай, Табасаран.

Мюгькам вуяв дуствалин гъяд,
Мерд кас хуш хялижв вуяв кIван.
Уву вува йиз бахтнан хяд,
Ккуни ватан, Табасаран.

Гьар жюре кюкйирихъди
Дабалгнайи багъ авадан,
Хъана уву гюрчег хьибди,
Йиз бахтавар, Табасаран.